2018 chungah nau 41 million thah an tong

2018 chungah minung tambik thihnak a chuahter tu cu ‘nau-thah’ a si. Vawlei cung ramkip ah nau an chuah hlan in thahmi hi ting 410 (41 million) leng an si, tiah Worldometers nih thawng a thanh.

December 31, 2018 tiangah chuah hlan i thahmi nau 41.9 million an si, tiah Worlddomerters nih a phuan. 2018 chungah cancer in a thimi 8.2 million an si. Kuak zuk in minung 5 million an thi i AIDS/HIV in 1.7 million an thi.

2018 i nau a pawimi vialte chungah cheu li cheu khat dengmang (23%) nih cun an fale an hrin hna hlan ah an thah (nau-thah) hna.

2018 chungah nau-thahmi hi cancer, raifanh, AIDS, kuak zuk, zuu le lam accident in a thimi vialte fonhnak in an tam deuh.

2018 chungah, pawimi nau thah lo ding timi Ireland ram upadi zong an thlen i an ram ah nau-thah an ngahter.

UK ram Ngandamnak Zung zong nih, “liamcia kum 10 chungah 2017 kha kan ram ah nau-thah a tambik,” tiah kan hnu zarh ah a phuan ve.

Khrihfa tampi nih cun nau-thah cu sual a si an ti i biatak tein an doh.

US ram zongah, nau-thah tha a pemi an um bantukin a dotu an tampi ve.

A ra laimi January 18 ah Washington DC ah “Kan I Sem Ni 1 in Minung Kan Si Cang (Unique from Day One)” timi tlangtar in nau-thah duhlonak an langhter lai. Kum fatin an tuah pengmi a si.

Mi cawnpiaknak le minung tamnak hmun ah nau-thah a duh lomi pawl vahternak in nau-thah donghter usih, ti hi lamzawh hruaitu pawl nih an i tinhmi a si.

Kum 1973 January 22 ah US Biaceihzung Sangbik (Supreme Court) nih US ram pumpi states 50 ah phungning tein nau-thah a rak ngahtermi philhlonak caah kum fatin January thla pengah nau-thah duhlonak an langhter peng ve.

Zeitin dah na ruah, nau-thah hi rampi cozah nih a onh awk si maw? Comment …

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.