Malaysia um Chinpa 'Joel' a tlau

October 30 ah a rak tlaumi tlangval Joel cu him tein an hmuh cang. Atu cu Kuala Lumpur ah a um lio si.

Joel cu October 30 ahkhan Johor state i a rianttuan hawi Chinmi pawl he an len lio ah a rak tlau. Thla cheu fai a tlau hnu, kan hnu zarh Nilini (November 15) ahkhan amah tein a rianttuannak hmun Johor Bahru ah a rung chuak tthan. Zarhteni ah Kuala Lumpur ah a ra.

“A tlau zarh 2 fai chung cu Johor state i Kawl phungki inn ah aa rak dor. Phone zong aa ken lo caah le thawng a kan thanh lo caah lungrethei tukin kan rak kawl pengnak a si…,” tiah an khuami sin in kan theih.

“Thawng kan rak thanh hna awk si nain… keimah daithlaan si, ka ngaithiam hraam uh a ti,” tiah an khuami nih an chim.

Joel cu Hakha peng, Vanha khuami a si. Kum 30 hrawng a si. 2009 ah Malaysia ram a phan. UNHCR card a ngei lo.

A hawile nih rianttuan huaha loin ni 5 chung an rak kawl nain an hmuh khawh lo caah lungrethei le ngaihchia ngai in November 6 zaanttim ahkhan Kuala Lumpur um a khuami sinah thawng an rak thanh.

A rak tlau ning

“Johor state i Johor Bahru khua ah rian kan ttuan. October 30 ahkhan thil caw dingin Jalan Baja lei ah kan kal hna. Joel he minung 4 kan si,” tiah a hawipa nih The Chin Express ah a rak chim.

“Joel nih ka paw ttam, rawl ka caw ta lai a ti, taxi chungin kan in hngah lai kan ti. Joel cu a rung kir ti lo. Ramtang lei ah a kalmi kan hmuh i kan va dawi nain khuazei a kal kan hngal ti lo.”

“Kan kawl lengmang nain kan hmu kho ti lo. Phone zong aa ken lo.”

“A tlau cangka in tuzaan tiang hi rian ttuan huaha loin ni 5 leng kan kawl cang nain kan hmu kho ti lo. Kawlnak zong kan hngal ti lo. Kan lungdong tuk cang.”

“Palek nih an tlaih maw si asiloah kirnak hngal ti loin a tlau dah si ti zong kan hngal lo,” a rak ti.

Atu cun, him tein le ngandam tein a rung kir tthan caah lawmh a um tuk hringhran.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.