Thongtlak ttih ruangah a zaammi Thailand Prime Minister hlun nu Yingluck Shinawatra, kum 52 cu Serbia rammi sinak (citizenship) a ngah cang, tiah Serbia media pawl nih zahan ah an tial.

Yingluck cu Thailand cozah lutlai Prime Minister a rak ttuan lio 2014 ah ralkap nih hramhram in le phungninglo in uknak an chuh.

“Tangka tamtuk dih in lothlo pawl a bawmh hna caah kan ram chawlehnak a tla” tiah kum 5 thongthlak dingin ralkap cozah nih 2017 August thla ah tazacuai an rak timh caah ramleng ah a zaam.

Amah le amah ttanhtu mipi nih cun “uknak a chuttu ralkap cozah nih amah le a chungkhar belnaang neh an duh hna ruangah tazacuai an timhmi si” an ti.

Zahan ah Serbia magazine Nedeljnik nih cozah catlap hmanthlak a tarmi chungah ‘Yingluck cu June 27 ah Serbia citizen a ngah cang’ ti aa tial.

Mah catlap cu Serbia Prime Minister Ana Brnabic nih minsen a thutmi si.

Serbia cozah biachimtu cu media nih bia an hal nain ‘chim awk kan ngei rih lo’ tiin a leh hna.

Yingluck aiawh biachimtu zong media nih bia hal an timh nain an pehtlai kho rih lo.

Yingluck a ttapa mirum taktak (billionaire) Thaksin Shinawatra zong Thailand Prime Minister a rak ttuan lio 2006 ah ralkap nih uknak an rak chuh ve.

Ziknawh ei case in thazacuai an rak timh caah ramleng ah a rak zaam. Liamcia kum zeimawzat ahkhan Thaksin cu Montenegro cozah nih a rammi sinak a rak pek.

Ttafar hna cu Thailand khuate lei sifak pawl nih an uar tuk hna nain milian Siangpahrang chungkhar nih cun an uar leem hna lo.

Thaksin cu atu hi Dubai le London kar ah khual a tlawng lengmang.

Yingluck cu ramleng ah a zaam hnu in, London, Dubai, Hong Kong le Japan ram ah khual a tlawng lengmeng.

Serbia passport a ngeih cang caah, visa sok hau loin ram 100 leng a tlawng kho cang lai tinak asi. — AFP

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.