AA nih an kal pimi Chin khua 2 kong hlat aa thawhmi atutiang an kir rih lo

February 7 – Paletwa peng chaklei ah a ummi khuate 2; Kha Muang Wa le Kin Ta Lin khuami hna cu hramhram in AA nih ramtang ah an kalpi hna. Mah kong hlat dingin minung 3 an i thawh, ni 2 leng a si cang nain atutiang an kir rih lo, tiah Zalen nih a ttial.

February 2 ah AA ralkap pawl nih Kha Muang Wa le Kin Ta Lin khuami hna cu Bangladesh ramri lei ah an kalpi hna.

Mah kong va hlat dingin, Kawl Ralkap nih Ta Ya Kung khuami U Aung Yioh le midang 2 cu February 5 zingka ah Kha Maung Wa le Kin Ta Lin ah an thlah hna.

Nain, February 6 zaan tiangah Ta Ya Kung khua ah an rung kir rih lo, Ta Ya Kung le Kha Maung Wa cu meng 2 lawng aa hlatmi a si.

Rakhine miphun pawl an umnak Kha Muang Wa khua cu inn 23 a um i Chinmi an umnak Kin Ta Lin khua cu inn 12 a um. An dihlak minung 124 an si.

Mah khua pawngah a um Miza khuami pakhat nih, “mah khua 2 ah AA ralkap an umnak hi thla 1 hrawng a si cang,” tiah a chim.

“Ta Ya Kung khua ah Kawl Ralkap battalion 3 hrawng an um. Kawl Ralkap nih a kan tuk lai ti an phan caah phaw caah khuami an i kalpi hna hi si.”

“Bangladesh ramri an phanh hnu ah Kin Ta Lin khuami pakhat nih kanmah khuami sinah phone in thil sining a rak chim. AA nih kan duh lo buin hramhram in a kan kalpi a ti,” tiah a chimchap.

AA biachimtu U Khine Thukha nih cun, “Kha Maung Wa le Kin Ta Lin khuami pawl cu an zaam i kanmah umnak hmun an rung phan…,” tiah Irrawaddy media sinah a chim. — Zalen

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.