AA nih Chin palek 2 an thah hna

Arakan Army (AA) nih January 4 i Rakhine state um palek sakhan an kah lio ah a thimi palek 14 lakah Chinmi 2 an i tel ve.

Chinmi 2 hna cu; Mang Lian Zam le Ko Khat Paung an si. An khua le an konglam dang cu kan hlat lio a si.

Chin palek 2 hi Nga Min Baw palek sakhan ah palek rian a ttuanmi an si. Mah sakhan ahhin palek 9 an thi i 2 hliam an tong. Adang palek sakhan 3 zong AA nih an kah hna i a thimi le hliam a tongmi an um len.

January zingka ah Rakhine state i Buthidaung pengah a ummi palek sakhan 4 cu AA ralkap 300 leng nih voi voi 1 ah an kah hna i pa palek 14 an thi, 9 hliam an tong.

Nga Min Baw palek sakhan cu AA ralkap 100 hrawng nih an pel, Kyaung Daw palek sakhan cu AA ralkap 100 hrawng, Kauh Pih palek sakhan cu AA ralkap 50 hrawng le Kha Ti Hla palek sakhan cu AA ralkap 100 hrawng nih January zingka 6:45am ah voi voikhat ah an kah hna.

Palek meithal zun 40 le kuan 10,000 leng AA nih an chuh hna.

Palek 14 le khuami nu 4 zong AA nih an tlaih hna nain an thlah tthan cang hna.

Myanmar cozah Thawngthanhnak Vuanci Zung nih, “AA thil tuahmi hi Rakhine state ah buainak le harnak chuahter an duh caah a si. Ralkap le palek nih fakpi in an lehrulh hna lai,” tiah cathluan a chuah.

AA nih, “Myanmar cozah ralkap nih fak tukin na kan tuk, helicopters le miakpi tiangin na kan tuk pinah AA do dingin ral a umnak hmun Kyaut Taw, Rathedaung le Buthidaung peng hna ah thla 2 chung palek nan rung chiah hna ruangah kan kahmi hna a si,” tiah thawng a thanh ve.

“Rakhine state ah ni fatin ngawt in i kahnak a um i ram chungah umnak ngei loin a vaimi an karh chin lengmang,” a ti.

Charhchan: Myanmar Ministry of Information le The Irrawaddy

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.