America patthawng Rung Lian Ceu cu ‘Naga Paih Zuamnak’ ah aa phomh ve lai

US in Kawlram tiangah Lai Paih champion a ngahmi patthawng Rung Lian Ceu cu a rauh hlan ah India ram ah aa va pai lai.

Nagaland state khualipi Kohima ah March 7 in thok dingin Avoi 12nk Hunmi Naga Paih Zuamnak (12th Open Naga Wrestling Meet) ah aa pai lai.

“Rung Lian Ceu cu Vawlei Pumpi Chin Paih chairman a simi Ang Cung he US in an ra lai. A tlaibik March 5 hlan ah an phan lai. US in a rami anmah he hmailei paih tthanchoternak kong zong kan i ruahte hna lai,” tiah Naga Paih Phu Funtomnak Bu (NWA) president nih a chim.

A tlangtar nih a langhter bangin ‘Hunmi Naga Paih Zuamnak’ cu, ahopaoh i pai kho hna seh tiin hunmi a si, nain ramdang bakin aa rung paimi cu an um bal lo. Rung Lian Ceu hi avoi 1nk bik ramdang in aa rung paimi a si lai.

Naga Paih cu Nagaland state ah a ummi hna i an pupa nunphung a si bang kum 1 dan pengin sunglawi taktak in Nagaland state khualipi Kohima ah an tuah lengmangmi a si.

Lai Paih le Naga Paih hi aa khat nain, annih cu angki lo bakin an i pai hna. Bawngbi tawi an i hruk, an tai ah rong/color puan an ttem hna. Lai paih bantuk tein, an tai ah ttemmi puan cun an i tlai, thazaang le thiamnak chuah in ttuangah tengh an i zuam. A tengtu nih teinak a co, tenghmi a sung.

Nain, thazaang tthawn lawng si loin, Naga paih cu Lai paih bang a thianhlim tuk caah zaanglek/sport dang he aa dang ngaingai. An paihmi minung kha ‘khrietho-u’ tiin an auh hna. A sullam cu ‘dawtmi hawikom’ tinak a si – patthawng hngalhnak caah le aa paimi hna karlak ah dawtnak le hawikomhnak fehternak caah tuahmi a si.

2018 Open Naga Wrestling champion Venuzo

“Champion a ngahmi cu laksawng ah India tangka ting 2 (4.2 million kyats) pek an si lai,” tiah NWA president Neivikuolie Khatsu nih a chim.

“Pahnihnak a ngahmi cu India tangka Rs ting 1 le cheu (3.1 million kyats) pek an si lai. 3nk laksawng cu Rs ting 1 (2.1 million kyats) a si lai.”

“4nk laksawng cu Rs 70,000 a si lai i quarter finalists cu Rs 10,000 veve pek an si lai. Pre-quarter finalists cu Rs 5,000 cio pek an si lai.”

“Ni kum laksawng dihlak kha India tangka ting 4 le thong 60 a si nain tu kum cu Rs 150,000 kan chap i a dihlak Rs 460,000 a si lai,” tiah NWA President nih a chimchap.

US ram in Rung Lian Ceu aa paih lawng si loin, India ram chung state dang a simi Maharashtra, Delhi le Jharkhand pawl zongin aa rung paimi an um lai.

Naga Paih Bu Funtomnak (Naga Wrestling Association) upa pawl

India Nunphung Dihlak Paih le Pankration Bu i an president C.A. Tombali le General Secretary Shailender Pathak zong nih 12th Open Naga Wrestling Meet cu an rung zoh ve lai.

Naga Paih Phu Funtomnak Bu (NWA) nih hin Paih Zuamnak phun 2 a tuah;

  1. Hunmi Naga Paih Zuamnak (Open Naga Wrestling meet) le
  2. Naga Paih Champion Cuhnak (Naga Wrestling Championship) hna an si. 2nk hi cu NWA member lawng i paih khawh a si. NWA ahhin paih phu 3 an i tel; Angami Sports Association (ASA), Chakesang Wrestling Association (CWA) le Zeliangrong Wrestling Association (ZWA) hna an si.

Avoi 12nk Hunmi Naga Paih Zuamnak cu Kohima khualipi ah March 7 ah Angami Zaanglek Bu (ASA) nih a tuah lai.

Nagaland hi Mizoram bang, hlan lio Chin ram (Chin Hills Regulation) ah aa rak tel vemi a si. Phun dangin chim ahcun, Chin kan unau an si. Nagaland an hmelchunhnak zong vakok a si ve.

Kum fatin December pengah Vakok Puai (Hornbill Festival) an tuah. An puai vialte lakah a sunglawi bikmi puai a si caah “Puai Vialte Lakah Puai Sunglawibik” ti zongin an auh.


Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.