Chimhlo ah le misual kan si, kan chimh ah le, mi mualpho ter kan si. Asinain, chim a herh mi, midang sual phawt ter lo mi cu, a herh cang ah chimh pah a herh ve tiah ka ruah caah mah ca hi ka tial mi a si.

1. Naturalized US Citizen ka si. Kawlram political party ah lut kho ka si lo. Lut zong kaa timh lo. US Citizenship hi hlonh kho a si. Alam zong ka theih ko. Asinain, ka nupi siseh (US Natural Born Citizen) a si mi ka fapa le fanu hna hi an sinak hlonh kho a si lo i, hlonh piak zong kaa timh lai lo.

2. Former President U Thein Sein nih auh timi kong hi cathiam, mifim, politicians, dohthlenhnak tuahtu ti pawl tampi hmanh nih an theih thiam lo mi a si. 2011 August (18) zan ah tlangcung mi hriam tlai vialte (Blanket Peace Officer) a tuah. Cu hnu ah Former Genenral le Minister a si mi U Aung Min le ahawi le pawl rian a khinh hna. An rian cu hriamtlai pawl vachawnh hna uh timi a si. Cu ruang ah CNF zong nih U Aung Min le a hawi le pawl he Hakha iton kha a si. 9 Points Agreement zong min thut a si. Ahmasa bik ah U Thein Sein nih kawlram tlung i, a mah he Myanmar Peace Center ah rian tuan ti ding a ka sawmh mi a si hrim hrim lo. 2012 ah MPC zong a um fawn lo.

3. LL.M karak kai lio te in The Burma Fund le a dang dang ah rian tuan tu Kawl cathiam pawl he rian ka rak tuan ti. Cu hnu ah Chinland Constitution Drafting, Federal Constitution Drafting, Formation of UNFCC ti bantuk hna ah rian ka rak tuan. Cu tik ah Kawlram chung i mifim pawl nih an tuah/dirh mi Myanmar Egress he kan raak i pehtlaih. Rak tlung ko ti a ngah lo tik ah, a thli te in pehtlaihnak kan raak ngeih cang. Asinain, U Thein Sein nih ramdang a phan mi Educated pawl rak tlung cang u law rian tuan ti hna u sih a ti hnu ah, ka rian tuan ti hawi a si mi, Dr. Zaw Oo, Dr. Tin Maung Than, Ko Aung Naing Oo, Ko. Aung Thu Ngyei pawl hi an rak tlung. Asinain, ka tlung kho lo mi cu hriamtlai bu a si mi CNF ah Chief Justice rian a kan khinh caah a si.

4. CNF in chuah tak hi a har ngai mi asi. Zei caah tiaah Kawl acozah he kan i chawnh hlanh deuh ah CNF chung ah Constitutional Crisis fak tuk in kan rak ngei. Phunghram a um ko mi zulh duh lo i, lutlai si lawng a duh mi an um ruang ah a si. Cu caah, adonghnak ah CNF hi chuah tak i, Yangon atlung cang mi ka hawi le hna he, Myanmar Development Research Institute (MDRI) ah rian tuan ding in ka rak tlung mi a si. 

5. MDRI ka tuan lio ah Immigration Reform, Legislative Reform, Political Reform, Administrative Reform ti mi acozah nih an tuah mi pawl ah a kan sawmh pah lengmah. Cu ruang ah President U Thein Sein he kan rak i tonnak a si. Ruah lo pi in Rakhine Ram ah buainak ngan tuk a chuak i, minung 940 reng lo an thi. Refugees/IDPs 70000 hrong an um tik ah President U Thein Sein nih Comission a dirh. Mah ah cun Commision Member rian a ka pek. Cu caah MDRI rian he kawp a ngah lo caah, ka ngol i, Rakhine Commission ah thla 7 chung research and finding kan tuah. (Mah rian tuannak caah Acozah nih Phaisa Fangkhat zong an kan pek lo. Commission nih phaisa kan i kawl. Adonghnak ah kan hmuh kan theih mi President sin ah kan pek. A rauh hlan ah Ducheeyatan timi Rakhine State ah a buai hawi. President U Thein Sein nih Enquiry Commission a tuah than i, thla 3 hrong ka tuan than rih.

6. Ducheeyaatan Comission rian kan dih le cang ka i, President U Thein Sein nih Myanmar Peace Center (MPC) a dirh i, U Aung Min hi Chairman a si. U Aung Min nih keimah kha Director position pek ding in President a chimh tik ah, ‘Andrew cu a tha tuk mi a si na in, Myanmar Citizen ka si lo ruang ah Legal Counsel tu raka tuan piak seh” a ti caah, MPC ah Upade Akyanpei ka tuan. NCA caah a herh mi Peace Agreements (180) hrong research tuah i, acozah ruahnak pek khi ka rian bik araksi.

7. Mah lio ah Constitution Remhnak kong a rak chuak. A tha ka ti lo, a tha lo ka ti lo. Zei dah remh nak duh tiah Interview ah ka rak chimh bal. Athar kan tial nan ti a si ah cun, (Structure) teh nan ngeih cang maw? (Substances) pawl nan ngei cang maw? tiah ka ti ruang ah Kawl Ral kap tanhtu tiah an rak ka ti. Cu hnu ah President U Thein Sein nih a ka auh than i, a Cabenet pawl he bia ruahnak saupi kan ngei. Cu ve bantuk in, Daw Aung San Suu Kyi State Counselor si awk ah dan serh an duh ah kha Kawl ralkap zong nih ruahnak an ka hal. Ka chimh mi hna cu, hlan lio te zei ruangh ah dah mah law hi 2008 ah nan rak tial. A si na in, pakhat te ai dang mi cu Presidential System ah State Counselor ti mi a um lo. Asinain, Parliamentary system ah cun a um ko. Zei system dah kan hmang lai timi tu hi tha te in ruah u law bia cei ko uh ka ti hna tik ah an lung a tling lem lo. A si na in, ka cung ah an thing a hang lem fawn lo.

8. MPC ah sau nawn kan tuan na in, acozah thar dirh a si tik ah NRPC ah an thlen. Cu tik ah MPC rian tuan tu pawl rian kan ngei ti lo. Cu caah kum 5 chung a tuaan ti mi pawl kan i khawmh than i, Center for Peace and Reconciliation (CPR) kan dirh. Second Panglong lio ah a kan sawmh ve. Papaper (72) a chuak. Page (800) reng lo a si. Mah cu Analysis and Review ka tuah. Mah cu Acozah lei nih an theih tik ah an ka hal i, voi tampi chimh felnak kangei. Cu hnu ah Government Policy Paper pakhat ah an ka tuah ter i, a tu tiang an hmang mi a si.

9. USDP lawng ka ruanak le theihnak ka cheuh mi a si lo. Tlangcung i komh bu (Nationalities Brotherhood Federation – NBF) he zong caan saupi kan tuan ti. A result cu (Ethnic Affairs Ministry) a chuahnak khi asi. NLD he zong kan tuan ti ko. Federal kong theih kan duh an ti ruang ah International IDEA le University of Chicago Law school he a tu katuan nak Myanmar Institute for Peace and Security workshop tampi kan tuah piak ko. Karen Party an si zong ah, Chin Party an si zong ah, Shan Party an si zong ah thleidannak pakhat hmanh kan ngeih hna lo. Politic ah cun zungzal ral kan ngeih lo i, zungzal hawikawm zong kan ngei lo. Issues and Interests lawng a um an ti ban tuk i, kan cawn mi, kan hngalh mi, kan theih mi pawl hmang i, Kawlram thatnak, Chinram thatnak tuan hi ka duh mi asi.

10. Kawlram ka rak kir kate ah Federalism timi capar pakhat ka rak tial i, acozah lei nih chuahnak nawl an ka pek lo. Thla 3 hnu ah chuahnak nawl an ka pek. Cu tik ah President U Thein Sein la a Cabinet Members pawl nih bia tamtuk an ka hal. Fefedel timi cu i thenhnak a si lo i, i thenhnak/chuahtaknak ti mi zong hi federal a si lo. Mah hnu ah NCA Principle Chapter (1), Article (1) ah Federal Union kan dirh lai timi President U Thein Sein nih a pomh i, CNA hnatlaknak a rak si mi a si.

11. Kawlram ka phak hnu ah Kawlca in cauk pali ka tial. Federalism Articles hi U Ye Tun (Thibaw) he kan tial mi a si. A dang pathum hi, MIPS Research Program caah ka tial mi a si. Tu kum 2019 ah hin Pathian nih rem a ti ah cun, cauk (3) tial ding i, rian kaa thawh lio a si.

Cu caah, Laimi (Chin) mi pawl nih FB le a dang dang ah caa hna kan tial tik ah fak pi in kan i ral ring a herh. Zei hmanh (facts and evidences) ngeih lo, mitkem ruang ah maw, a dang ruang ah maw ca tial hna hi cu kan hmang lo a tha.

U Thein Sein sin ah zei hmanh ka hal lo. U Aung Min sin in zei hmanh ka hal lo. A ho sin hmanh ah zei hmanh ka hal lo. Keimah ka hlawh te in ka nupi le ka fa le ka cawm hna. Ka rian a si. Midang ban tuk in Business a tuah thiam mi zong ka si lo. Ca rel, khua ruat, ca tial lawng ka thiam mi a si.

A ngai ngai te ti ah cun, “Zeidah na duh, zei dah kan in tuah piak lai” a ka ti mi an tam tuk. A si nain, mi sin in duh mi hal le lak a duh mi ka si lo. Cu lo ah cun, Rangoon ah hin, Inn thatha, Motor thatha, nuam te in a um kho mi ka si ve ko.

Cu caah, nan tial hlanh ah ruah ta u. Fact kawl ta u. Research tuah ta u. Mah hnu ah tial u. Beer mawngh nawn in, Til khuaih pah i, Computer Keyboard duh poh hmeh in, High Speed Internet in Hero tuah i timh tuk hlah u.

Ngun Cung “Andrew” Lian, SJD.
Director, Federalism and Constitutional Reform Program
Myanmar Institute for Peace and Security
Tel: 09420118186, Email: nclian@mips-mm.org

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.