Aung San Suu Kyi nih Henry Van Thio Tower a hun
  • Henry Van Thio Tower le Lawng Innka a hun
  • Hakha No. 2 High School le Hakha College ah a kal

Pu Thla Hre [Hakha] – January 21 zing sml 08:00 ah Myanmar pumpi a kan hruaitu State Counsellor Daw Aung San Suu Kyi nih Hakha khuacuanhnak Viewpoint ”LAWNG” innkaa le ”Henry Van Thio Tower” parthlam hunnak a kan tuahpiak.

Sang kip in mi tam ngai an ra kho. LaiLaam he Vaahla he tlamtling ngai a si caah lung a hmui khun.

Rampi cozah chungtel vuanci U Min Thu, rampi vuanci Dr Aung Thu, ralkap bawi Kyaw Swe le Ye Aung le Hakha Viewpoint saknak bu chairman Pu Thla Hre hna nih hunnak hri an tan.

Puanzar hunnak a hmeh lio

Mah hnu ah, Aung San Suu Kyi nih Henry Van Thio Tower signboard puanzuar hunnak seh khaloh a hmeh i a hun hnu ah, a chungah a lut i a zoh. Parthlam cungin, khuasik zingka i Hakha aa dawhnak a cuan.

Hi Tower hi Myanmar Vice President Pu Henry Van Thio dirkamhnak le thazaang peknak thawng in Halkha aa dawhnak le mi zaapi khuacuanhnak caah kan chunmang manhmi a si.

Harnak le dohnak tampi lakah aphi chuak lak in tuahmi a si i minunsiang 64 hna thazaang peknak thawng in tlamtling ngai in kan tuah khawh hi a si.

Kawlram hruaitu vawleicung minthang mi zaapi i Democracy kan pi hrimhrim nih a kan hunpiak mi cu Chin miphunkan caah roling tuanbia a kan tial piak a si ko tiah ka ruah.

Kan pi Suu le a tuanhawi vialte ngandamnak le nunkhua saunak thluachuah hmu hram ko hna seh.

Suu Kyi cu 8:30am ah Hakha No. 2 High School ah a kal i ca a cawng liomi siangngakchia le sianginn khaan pawl a zoh hna. Pu Cuam Bik Hall ah saya/ma he an i tong hna i, sianginn sining le herhhai an i ruah hna.

Mah hnu ah, Suu Kyi cu Hakha College ah a kal i siangngakchia hna nih Lailaam in an don. College Library le cacawnnak khaan pawl a zoh hnu ah, siangngakchia pawl a chawnh hna i a herhmi kan i bawm hna lai tiah bia a cah hna.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.