Helicopter in ka tlawnnak paoh ah pawngkam inn cungcih le hruang pawl an rawhmi ka hmuh lengmang, a rawkmi vialte ka liamh hna lai, liamh a tong lomi nan um ahcun ka theihter uh, tiah Rampi Ruahnak Petu Aung San Suu Kyi nih a chim, tiin 7Day Daily nih a ttial.

January 20 ah Thantlang khuami he i tong dingin a kal lio ah, helicopter thli nih donnak an tuahmi kutka a thlukmi kong he pehtlai in Suu Kyi nih atu bantukin a chim hi si.

“Ka ttum lio ah, keimah donnak an tuahmi kutka a tlukmi ka hmuh. Cung in ka zoh lio ah, kutka hnu in mipi nih an ka hngahmi ka hmuh. Aa ka dongtu mipi hnulei ah keimah hmanthlak an thlirmi zong ka hmuh,” tiah Suu Kyi nih a chim.

“Helicopter in ka kal tikah, thil pakhat kaa fiang. Helicopter in ka ttum fatin pawngkam harnak a pek peng hna. Thli a pinh tuk caah inn cungcih a rawhmi le hruang/hau a rawhmi ka hmuh lengmang,” tiah a chimchap.

Hmanthlak: Salai Mui Dawh

2018 August thla ah Mandalay um Mahamuni Buddhist Biakinn ah a kal lio zongah, a rung zohtu minung pawl ruangah a rawkmi dawr 2 cu Suu Kyi nih a rannak in tangka a rak liamh hna.

Myanmar ram tthancho ter kan duh kan ti tikah, tangka in rumter kan duh ti si loin rammi hna an lunglawmh ter kan duh ti tu khi a si.

Ram tthancho le cholo cu ‘kan him’ ti hi rammi hna ruahnak, taksa le thinlung ah zei tluk dah a um timi cungah aa hngat, tiah Suu Kyi nih a chim.

“Cheukhat cu, vote ka thlak cang i ka rian aa lim cang, a tangmi cu cozah rian a si a timi zong an um. Cucu a dik lo. Kan rian cu tlamtling lakin kan ttuan a hau. Cozah cung zongah, cozah rian ka tlamtlinter lai timi lungput kan ngeih a herh,” a ti.

Cun, Suu Kyi cu Falam khuami he tonbiaruahnak a ngeih lio ah, “GAD rianttuan ( ေထြအုပ္၀န္ထမ္း) pawl nan fim le dinfel a herh,” tiah a chim.

Mino pakhat nih ‘GAD rianttuan ka duh’ a timi kong he pehtlai nih Suu Kyi nih hitin a chim hi si.

“GAD rianttuan pawl nan fim a herh. Nan fel a herh. Fim ka timi cu mah ca lawng i fim kha ka chim duhmi a si lo. Kan rianttuannak pengtlang caah fim khi ka chim duhmi a si,” tiah a chimchap. — 7Day Daily

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.