Australia Biakinn ah minung 2 namte sawh an tong

Sydney khua ah a ummi biakinn Church of Scientology ah kum 16 pa nih pa pahnih nam in a sawh hna, pakhat a thi.

Biakinn kalnak lam ah nam in a sawh hna hi si.

Biakinn chungah ngakchia pa cu ningcang loin a um ruangah biakinn rianttuan pa pahnih nih an rung chuahpi i an thlah lio ah 25cm a saumi nam aa chuah i pakhat cu a hngawng ah a sawh.

A hngawng ah a sawhmi kum 24 pa cu sizung Royal North Shore Hospital ah an kalpi colh nain chanh khawh loin a nunnak liam.

“Pa pakhat zong cu a sawh ve i hma a bunh ve,” tiah palek sungtthoh bawi Simon Jones nih a chim.

Kum 16 pa cu a hmun ah palek nih an tlaih. A min le a konglam zeihmanh an chim rih lo.

Biakinn cu Chatswood sang i Greville Street ah a ummi, kum 2016 ah David Miscavige, Church of Scientology hruaitu nih a rak honmi a si.

Australia ram pumpi Church of Scientology biakinn vialte i an headquarters zong a si. — 9 News Australia

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.