Australia cozah nih minung 6 thattu pa thih tiang thong a thlak

Melbourne khuapi ah lamkam i mibu nganpi mawtaw in a pah i minung 6 a thattu Australia pa cu Victoria state Biaceihzung Sangbik (Supreme Court) nih a nungchung thongthlak peng dingin bia a khiah.

A nun chung thongthlak a si lai, ‘nun zia ttha tein ka um cang lai tiin palek sinah bia aa kam’ ahcun a tlawmbik kum 46 chung thonginn chungah hren hnu ah thlah a si te lai, tiah biaceihzung nih a khiah.

James Gargasoulas, kum 29 nih 2017 January 20 ahkhan Melbourne khuapi i shopping mall hmai lamkam ah a ummi minung tampi cu mawtaw in a rak pah hna i minung 6 an thi.

A thahmi minung 6 lakah kum 10 ngakchia nute zong aa tel ve.

“James nih mi na thahmi hna hi Australia tuanbia chiabik lakah pakhat a si ve,” tiah Supreme Court biaceihtu Mark Weinberg nih a chim.

“Na thil tuahmi nih Bourke Street ah a rak ummi le na thil tuahmi a hmutu pawl cu tuksapur in a rak chiah hna,” a ti.

James nih mi a rak thah ka ah, “ralhrang he pehtlaihnak a ngei lo, anih hi inn chungkhar zongah buai a hmangmi le rithaisii nih a ruahnak a thlenmi minung a si” tiah palek nih an rak chim.

Kum 1996 ahkhan Tasmania state i Port Arthur ah minung 35 cu meithal kah in thah an rak tong. Mah hnu in nihin tiang Australia tuanbia chiabik lakah James lainawnnak hi aa tel ve. — Reuters