WACCC honnak puai
Nitlaklei Australia Chin Khrihfa Biakinn (WACCC) honnak an tuah lio - Hmanthlak: WACCC

Australia Cozah Lutlai bak nih Western Australia state i Chin Khrihfa Biakinn (WACCC) thar hon lawmhpinak ca a kuat hna.

WACCC cu September 15 ah honnak puai an tuah.

Kan pipu rohmi Chin state hmanh ah Myanmar President nih Chin biakinn thar hon lawmhpinak ca a kan kua bal lo.

Australia Cozah Lutlai (Prime Minister) Scott Morrison hi mi ttha taktak a si ti a lang. Australia Chinmi hrim zong dawt awktlak in an rak um ti a fiang.

Scott Morrison nih lawmhpinak ca a kuatmi hna
Prime Minister Scott Morrison nih lawmhpinak ca a kuatmi hna – Photo: Senator Dean Smith

“Prime Minister nih lawmhpinak ca a kuatmi hna cu Mipi le Tangka Zohkhenhnak Vuanci Mathias Cormann bak nih biakinn honnak puai ah a rung put i a relpiak hna,” tiah Ram Tinthei nih a ttial.

Scott Morrison Malaysia a rat lio
Pu Scott Morrison, Malaysia ra in Chin ralzaam ngakchia pawl an cacawnmi a zoh lio – Hmanthlak: ICC/FRO Chairman John Bawi

Liberal party chungtel Pu Scott Morrison cu August 24, 2018 ah Cozah Lutlai (Prime Minister) ah an thim. Kha hlan, MP a rak si lio tein Chin khrihfa ralzaam hna cu a hnakkar ah a rak tenh ngai cang hna.

Malaysia zongah a rak ra i Chin ralzaam bu pawl a ton hna, Chin ralzaam ngakchia pawl an ca cawnning a rak zoh hna i Lai Christian Fellowship (LCF) biakinn zongah aa rak pum.

WACCC biakinn thar honnak puai ah khual lian in MP Dean Smith zong an sawm. Biachimnak caan zong an pek. Lunglawmhnak Roca zong an pek.

senator dean smith hakha a kal lio
Senator Dean Smith, Hakha ah a tlawn lio – Hmanthlak: Senator Dean Smith

Hlutdaw Sang chungtel/senator Dean Smith zong hi Chin khrihfa ralzaam cungah dawtnak a ngei ngaimi a si. UNHCR nih Chin ralzaam donghter dingin thawng a rak thanhka ah, “UNHCR nih mi ramdang ah Chin ralzaam zohkhenhtu ngei loin chiah na timhmi hna hi zohfel tthan ko sawh..,” tiin Geneva um UNHCR Headquarters ah ca a rak kuat.

UNHCR ah ca a kuatmi cu mah hi HMET law rel khawh si

Senator Dean Smith cu 2018 zongah Hakha tiang a rak tlawng. Myanmar Vice President Henry Van Thio he zong tonbiaruahnak an rak ngei. 2019 January zongah Senator Dean Smith le adang Australia MP/senator pawl Chin state ah an tlawng rih lai tiah theih a si.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.