Perth, Western Australia – Chin miphun a kan dawtu le a kan bawmchantu Senator Dean Smith nih Perth khua um Chin upa vialte meeting a kan sawm.

Chin Khrihfabu dihlak council upa vialte, Perth khua um Community upa vialte, Perth khua um Pengtlang upa vialte le Perth khua um CYO upa vialte, Perth khua um University upa, Chinland Club upa vialte le Malaysia le India ram ah chungkhat rualchan auhnak a tuahmi dihlak cu meeting a kan sawm dih.

Senator Dean Smith nih, “Western Australia state um Chinmi kong kan ceih hna lai,” tiah sawmnak ca chungah a ttial.

“Naite i Kuala Lumpur ah ka va tlawnnak kong le Independent Chin Communities (ICC) upa pawl he i tong in UNHCR nih Malaysia Chin ralzaam donghter a timhnak kong kan ceihmi zong tutan meeting ah kan i ruah hna lai.”

“2018 kum dongh lai asiloah 2019 kum thok ah Chin Nuhrin Covo Bu (CHRO) le Australia Chin hruaitu pawl nih Australia cozah ton dingin ka sawmmi hna kong zong kan ceih hna lai.”

“Cun, adang Chinmi kong tete zong kan ceih hna lai,” tiah Senator Dean Smith nih a ttial.

Senator Dean Smith cu October thla dongh lai ah Malaysia a ra i ICC (CRC, ACR, FRO, ZAM, tbk.) upa pawl le CHRO he tonnak a ngeih hnu ah Malaysia um pengtlang upa 100 leng he zong tonnak a ngei. UNHCR nih Chin ralzaam donghter a timhmi kong an rak ceih hna i a si khawh chungin lam kawl ding an rak ti.

Meeting tuahnak ding;

  • Ahmun : WACCC Biak Inn
    25 Suffolk street, Caversham
    WA, 6055
  • Ani : November 10, 2018 (Saturday)
  • Acan : 11:00 am

Charhchan: Pu Renny Ceu L Mang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.