Hakha peng Bungzung khua pawng ah ni fatin mirang vawlei tun 100,000 a chuah khomi sehzung le ti-lekṭhik kan ser lai, tiah Sipin Vuanci U Soe Htet nih a chim.

U Soe Htet nih, “Bungzung ah mirang vawlei sehzung kan ser ahcun ni khat ah tun ting 1 a chuah khomi kan ser lai. Rampi cozah nih a tuahmi si caah, Chin state cozah nih a dikthlir in kan hngal rih lo nain rianrang in tuah a si lai,” tiah a chim.

“Mah pinah, mei 32 MW a chuah khomi ti-lekṭhik pakhat le 43 MW a chuah khomi pakhat zong tuahnak caah hmun 2 kan thim cang. Ti-lekṭhik tuahnak ding ahcun a tlawmbik kum 3 lole kum 4 paoh cu a rau kho rih,” tiah a chim.

Bungzung khua pawngah mirang vawlei sehzung sa dingin tender a ngahtu company cu rampi cozah sinah ngunkhuai a pek lomi a tam tuk caah tender an chuh i rampi cozah nih a thar in tender a auh ṭhan lio asi, tiah U Soe Htet nih a chim.

“Avoi khatnak company kha a tlamtlin lo caah adang company pakhat he tling tein an i ceih dih cang. Rampi cozah nih a tuahmi si caah Chin state cozah nih a dikthlir in kan hngal lo,” ati.

Bungzung khua pawngah sehzung saknak hmun 3 an thim cang. Cu chungah a hmun rem biknak ah an sak te lai. — Chin World

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.