CCF tangka RM68,000 Van Bawi Lian kut ah a tlau
Chairman hlun Van Bawi Lian le a nupi vanlawng in Kawlram an tlun lio

Malaysia – Chin Christian Fellowship (CCF) tangka RM68,984 le US dollar 550 cu chairman hlun Van Bawi Lian kut ah a tlau. Tangka a hmannak an check dih hlan ah Kawlram ah a tlun tak hna.

Updated: CCF upa tam deuh kan chawnh hna i auditors report zong ttha tein kan zoh dih hnu ah a zat (number) le thil sining a dikthlir tein kan rak update tthan.

“Tangka kan audit ta lai, Kawlram ah tlung rih hlah. Na vanlawng ticket man cu kan in liam piak te ko lai,” tiah CCF pastors nih an thloh nain a duh lo.

September 10 ah EC chungtel dihlak minung 50 leng CCF center ah meeting an tuah i ‘Pu Van Bawi Lian cu kan cawh lai…’ tiah biachahnak an tuah.

Mah kong he pehtlai in, CCF treasurer le EC upa pawl cu The Chin Express nih kan chawnh hna i tangka a tlau ning cu atanglei bangin an chim.

RM68,984 cu Van Bawi Lian kut ah a tlau

2018 January 7 in May 6 tiang CCF tangka a lutmi dihlak hi RM431,473 a si. Mah chungah Accountant le Chairman a simi Pu Van Bawi Lian nih a hmannak a langhtermi hi RM249,198 a si.

RM182,275 a taang ding a si. Nain, treasurer Chan Hup sinah a ummi tangka hi RM113,291 lawng a si i a taangmi RM68,984 cu accountant & chairman Pu Van Bawi Lian kut ah a taang – treasurer sinah a ap lo. A tawifiannak;

  • CCF Tangka hmuhmi dihlak = RM431,473
  • Van Bawi Lian hmanmi dihlak = RM249,198
  • Tangka a taang dingmi dihlak = RM182,275 (RM431,473 – RM249,198)
  • Treasurer Chan Hup kut ah a taangmi = RM113,291
  • Van Bawi Lian kut ah a taangmi = RM68,984 (RM182,275 – RM113,291)

Zeitin dah Van Bawi Lian kut ah tangka a taan khawh?

March 18, 2018 Zarhpini ah CCF ttengnge (Cheras, Puchong, Klang, Seremban, tbk.) lei in tangka a lutmi vialte cu treasurer Chan Hup sinah phan loin a tlau dih. CCF ttengnge pawl an hal hna tikah, Van Bawi Lian sinah kan ap ti a si.

Van Bawi Lian cu CCF chairman pinah accountant zong a si chih.

2018 January 7 in May 6 tiang, thla 4 chung tangka hmannak cauk (accountant book) cu Van Bawi Lian kut ah a tlau.

Van Bawi Lian nih amah nawl in tangka a lak peng

CCF bylaw ahcun ‘tangka lak tikah control officer (secretary) nih theihpi nak min thut piak si seh’ ti a si. Secretary cu zung a kai tawn lo caah, pastor te nih min an in thutpiak seh an ti nain Van Bawi Lian nih a duh lo.

“Pathian chaw cu aho nih dah a fir ngam lai, theihpi nak min thutpiak a hau lo cuh…” a ti.

Crusade, camping le civui, tbk. puai kan tuah caan ah Chairman Van Bawi Lian nih ‘tangka mah zat a herh…’ tiin aa ka hal i ka pek tawn, ka pek caan le a zat cu ttha tein receipt kaa chiah dih i auditors nih an check dih ko. Chim duhmi cu Van Bawi Lian nih tangka a lak tikah EC maw, control officer maw asiloah pastors te nih maw hnatlakpi le theihpi ti bantuk a um lo, amah nih a duh lo, tiah treasurer nih a chim.

$550 Van Bawi Lian nih aa hlep

Rev. Thla Thawng Cung nih May 22 ah CCF tangka $1,995 cu CCF Accountant & Chairman Pu Van Bawi Lian sinah a ap. Van Bawi Lian nih dollar thlen a thiam lo caah saya KB ka zul a ti. Saya KB nih a zulh i Sungei Wang ah an va thlen tikah Van Bawi Lian nih $1,455 lawng a chuah.

$550 cu Van Bawi Lian kut ah a taang. Hnu ah an hngalh.

Auditors nih tangka kan check lai an ti peng nain a ra duh bal lo. Ka damlo i sekhan ka kal lai tiin khunh a lak lengmang.

Van Bawi Lian kut ah tangka a tlau tiah Auditors nih an fehter

CCF auditors pawl nih ttha tein an check dih cikcek hnu ah ‘Van Bawi Lian kut ah RM68,984 le US dollar 550 a tlau’ tiah an fehter cang.

September 10 zongah EC nih meeting an tuah i ‘Van Bawi Lian nih liam seh, kan cawh lai’ tiin biachahnak an tuah.

Van Bawi Lian nih a thli tein Kawlram ah a tlun tak hna

CCF EC pawl The Chin Express nih kan chawnh hna tikah, Van Bawi Lian nih ‘ka dam lo, sekhaan kal ka hau’ tiin khunh a lak lengmang i audit tuah tikah a ra tawn lo, an ti. Sekhaan kal loin Lahwahkah zung ah a kal i Kawlram tlunnak a rak tuah peng.

CCF chairman le accountant a si buin Kawlram tlunnak aa rak tuahmi cu ahohmanh a rak chim duh hna lo.

A tlunnak ni 3 aa duh ceo ah CCF upa nih an hngalh. Amah hmanh nih a chim hna lo.

Van Bawi Lian nih a chimmi kong he pehtlai in CCF upa hmurka

“A thli tein meeting an tuah,” tiah Van Bawi Lian nih Lai media cheukhat sinah a chimmi kha a dik lomi si, tiah CCF upa nih an chim.

A thli tein meeting kan tuah lo. August 4, Zarhteni zaan ah, Chairman Van Bawi Lian le a nupi cu August 8 ah Kawlram an tlung lai ti thawng kan theih, anmah nupa hmanh nih a kan chim lo, tiah CCF upa pawl nih an chim.

Cucaah CCF pastors 3 cu August 4 zaan tlai hnu ah rianrang in emergency meeting an tthu, “Pu Van Bawi Lian hi January in April tiang thla 4 chung tangka a hmannak vialte audit tuah hmasa loin Kawlram tlunter cu a si kho lo…” an ti caah August 5 (Zarhpini) zaan ah Pudu biakinn ah pastor 3 le OC le pulpit upa pawl cu meeting an tuah tthan i;

  1. Van Bawi Lian hi i thloh sehlaw camping dih ah phaisa a hmannak zoh tthan si seh, cun
  2. An tlunnak vanlawng ticket man cu CCF khrihfabu nih liampiak siseh, tiah an lungtling

August 6 zingka 10am ah CCF center ah Van Bawi Lian cu an chimh/thloh i a duh lo.

‘Tangka ka hmannak cu kahin rak check te ko uh’ a ti hna i a cazin a pek hna. Nain, cazin ahcun thla 2 chung tangka hmannak lawng a um i January 7 in May 6 tiang thla 4 chung tangka hmannak a bau.

Van Bawi Lian nih cazin tlinglo a pekmi hna cu aa thawh i Lai media cheukhat sinah ‘ka palh lo ka ti bak lo, nain incharge ka pek cang hna i a dih ko cuta…’ a ti hoi.

An thloh khawh lo caah “va tlung ko kun law, thla 4 chung tangka hmannak kan tuakmi a phi cu thawng kan in thanhte lai i a herh ningin pehzulh a si te lai,” an ti.

A tlun ding cu a chimh bal hna lo pinah, CCF upa pawl nih anmah tein an theih i an thlohmi zong cu a duh lo i cutin August 8 ah a nupi he an tlung.

CCF cu camping an tuah liopi a si caah, chairman thar zong an thim manh lo i chairman loin thla 1 chung an um hnu nizaan tihni September 10 ceo ah Vice Chairman Pu That Dun cu Chairman ah an kaiter.

##Chairman hlun Van Bawi Lian zong bia kan hal ve lai i a chimmi kan rak post ve te lai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.