Chin khrihfa 6 Kawl Buddhist nih an hliam hna, Christmas tuahnak umkheng an khuaipiak dih hna

Magwe Region — Gangaw peng i Paw Lel khua ah a ummi Chin khrihfa hna cu inn chungah Christmas puai tuah dingin rawl an chuan i thla an cam lio December 17 zaan ah Kawl Buddhist pawl nih lung ngan pipi in an cheh hna caah 6 hliam an tong.

Pakhat cu fak tukin alu kuai.

Christmas puai caah an chuanmi tirawl zong an thletpiak dih hna pinah umkheng zong an khuaipiak dih hna. Sehti le motorcycle 5 zong an hrawhpiak hna.

“Khuami Khrihfa 20 hrawng cu pumpak inn ah Christmas thlacamnak an tuah lio ah lung in suimilaam 1 chung hrawng an cheh hna,” tiah Gangaw peng Baptist Christian Association nih a chim.

Inn an hrawhpiak mi hna

“Mah hnu ah, pa pawl nih inn chungah an luhhnawh hna i thil an hrawhpiak dih hna,” a ti.

“Rawl kan chuan dih i thla kan cam lai kan ti lio ah inn hmai, hnu, chak le thlang tiah a dihlak in lungin a kan cheh. Minung 6 hliam an tong. Pakhat cu alu fak tukin kuai,” tiah inn chungah a um vemi Rev. San Kew nih a chim.

“Motorcycle, sehtti le Christmas zaanriah hrawmnak caah kan timi umkheng vialte zong a kan khuai piak dih. Kan ttih tuk caah innkhaan chungah kan i thup dih hna, a hrawktu min cu kan hngal hna lo.”

“Paw Lel khua ahhin inn 52 kan um. Inn 4 te lawng khrihfa kan si.”

“Christmas kan tuahnak inn ngeitu Wa Dawns nih palek sinah report a tuah. Khuami 30 hrawng a report hna,” tiah a chimchap.

Christmas caah voksa an chuanmi an thletpiak dih hna

Gangaw peng palek bawi Soe Nyunt Aung nih, “Misual Dantatnak Upadi Dal 337 le 427 in case kan tuah lio a si. Pakhat upadi cu mi fahnak pek le pahnihnak cu mi thil hrawh hmang dantatnak upadi an si,” tiah a chim.

U Tin Myat, Min Ywa khuate komh bawi nih, “chungkhar vengtu dingah inn ah palek le meithat kan chiah hna,” a ti.

U Aung Hsan Myint, Magwe Region MP nih, “misual pawl cu an tuhmi theipar zunter hrimhrim hna ding a si. Midang nih an biaknak puai an tuahmi doh a ngah lo. Misual pawl cu upadi ningin a theipar zunter hrimhrim hna a herh,” a ti.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.