Chin ngakchia 2 a tlaihhremtu Evan Lal Biak Lar cu kum 43 thong an thlak

Pathian thawngttha chim Evan Lal Biak Lar @Lar Boih cu Chin ngakchia 2 na tlaihhrem hna tiin Kalay district biaceihzung nih nizaan ah kum 43 thong a thlak.

Evan Lar Boih cu kum 20 thongthlak khawhnak Tlaihhrem Dantatnak Upadi Dal 376 veve in taza an cuai.

Cun, kum 2 thongthlak khawhnak Tlerhkhonh Dantatnak Upadi Dal 506 le kum 1 thongthlak khawhnak Fahnak Pek Upadi Dal 323 in taza an cuai chih.

Biaceihzung nih “a tlaihhrem taktak ko hna, a tlerhkhonh fawn hna pinah fahnak a pek hna caah kum 43 thongthlak si seh…” tiah nizaan ah bia a khiah.

Evan Lar Boih le a nupi cu Kalay peng, Latpanchaung khuate ah an um. A nupi hi an inn ah tuition a chimmi si.

Chin state, Falam khua in nu ngakchia 2 cu sanginn kai dingin Lar Boih te inn ah an rung um i Taungphila le Latpanchaung ah siangin an kai.

Kum 15 nu cu 2015 July thla ah a tlaihhrem i kum 14 nu cu 2018 April thla ah a tlaihhrem tiin ngakchia hna i an nulepa nih 2018 April 13 ahkhan Tahan palek sakhan ah an report.

2018 May 11 ah Kalay district biaceihzung ah tlaihhrem, fahnak pek le tlerhkhonh case in taza an cuai. Mah vialte hi Evan Lar Boih nih a tuah taktak ko tiin nizaan ah biaceihzung nih kum 43 thong a thlak hi si. — Zalen, Chinland Today

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.