Chin nu cu a boss Singapore nu nih Facebook ah a thangchiat

Singapore nu nih a sinum Chin nu cu Facebook ah “Myanmar sinum nu Halar Nay Tial hi i ralring uh” tiah zohchia tukin a thangchiat. Mah cu alar taktak, Singapore rammi le Kawlram mi thong 5 (5,000) leng nih an share i voi 1,500 leng an comment.

Singapore boss nu Cui Juan (Facebook account Amy Tree) nih October 15 ah Chin nu kong cu voi 15 leng bak a post. Atang i CCTV video zong hi a post i “Sinum nih a boss nu hmunhma ngah a duh ruangah horduhcuai in boss pa a lor” tiin ca a ttial.

Singapore nu nih a tarmi cu minung tampi nih comment ah an soisel. ‘Na nahchuah i si ko hih’, ‘na ziachia tuk, boss dingah nai tlak lo’, tbk. a phunphun in an comment.

“Mah sinum nu hi lih chim a tthawng taktakmi si. Chah takin aa ttamh i rianttuan a tha thu. ‘Singapore ram ah ka um thai khawhnak hnga Singapore pa sinah nupi i tthit dingin theihternak ka tuah’ aa ka ti,” tiah Amy Tree nih a ti.

Atang hmanthlak hi a tar tthan i “sinum nih a boss pa horduhcuai in a lor” tiin a ttial rih.

Lih si ko lai

October 22 ah “Myanmar sinum Halar Nay Tial hi i ralring uh” ti tlangtar in sau taktak a ttial tthan i October 15 ah a rak tarmi hmanthlak pawl cu a tar chih tthan.

“Mah sinum nu nih hin October 11 ahkhan ‘ka duhmi tuahnak caan’ ka pe ve, cu bantuk company sermi coffee le chocolate hna zong ka pe ve aa ka ti. Ka duh lo caah aa ka auhnawh i 9pm hrawngah keimah nawl loin leng a chuak.”

“11pm ah, aruang um lo piin ka phone le passport ka pe aa ka ti. A tlai cang i thaizing zingka ah kan pek te lai ka ti nain aa ka auhnawh i kan ihnak khaan kil ah aa ka deet. Ka fate tiang a ttap beh.”

Singapore chin nu rianttuan lio
Ka sinum Myanmar nu nih rianttuannak ah fashion show a piahmi – Singapore nu Amy Tree

“Inn phone in mi ka chawnh hna lai hih, tiin aa ka tlerh. Tuah awk ka hngalh ti lo caah palek ka chawnh hna lai hih ka ti. ‘Na chawnh hna cun naa ngaichih lai, aa ka bengh, ni fatin aa ka velh tiin ka chimh hna lai’, tiin aa ka tlerh hoi.”

“Palek an rung phanh ahcun ruah lo piin kan dihlak hmai ah thang taktak in a ttap. Palek nih ‘ziah na ttah?’ tiah an hal i ‘ka paw khim bal lo, ka mitkuh vuai bal lo, ka boss nu nih ka malit tiah hramhram in zanttim tiang aa ka malit ter peng, a nithla dih cangmi shampoo le tak kholhnak chapiat hna aa ka pek’ tiin a leh hna. A lau bakin ka lau i ka ngong.”

“Kanmah hlan ah le kanmah sinah breakfast a ei pengmi, ni fatin zaan 9pm hrawngah a ih pengmi, zingka 8am hnu pengah a thawhmi pawl CCTV video record cu palek ka piah hna.”

“Ziah lih na chim? tiah kan hal hnu ah a dai tthan. Ka sin a phanhka ahhin 65kg lawng a rak si nain atu thla 2 kar ah 6kg a thau (70kg leng a si) cang. Amah duh bangin ShengSiong Super Market ah Dove shampoo, sam pawngnak le tak kholhnak chapiat zong ka cawkpiak ko.”

Palek an rat lio
Palek an rat lio

“Kan ihnak khaan ah movie zoh a duh ruangah kan malit lai aa ka ti i aa ka malit mi si. Hramhram in ka malit ka ti bal lo.”

“CCTV nih video a thlakmi pawl zoh tikah; rawl a chuan liopi ah angki liangbah le a sexy mi skirt tawi tete aa hruk, kholhnak towel hna aa aih salam. Ziah ttha tein thil naa hruk lo? tiah palek nih an hal tikah, a aw a neemter i ‘khua a lin tuk’ tiin a leh hna.”

“Aa ka velh peng na timi hna cu atu palek an um lio ahhin ka report ca ka ti. Palek nih tehte kan piah tuah ca an ti i ‘tehte umlo’ a ti hna,” tiah Singapore boss nu nih ttial.

Chinmi telh in Kawlrammi tam deuh nih cun Singapore nu cu comment ah an soisel len.

Nain, Chinmi cheukhat le Kawlrammi cheukhat nih “Halar Nay Tial hi Myanmar a si lo, India rammi a si. Mizoram state in Myanmar ram ah a ra i lih in Myanmar passport aa tuah hnu ah Singapore ah a kalmi si…” tiin an comment ve, nain tehte an langhter lo.

Chin Nu nih a leh ve

Singapore boss nu nih a tag mi Caroline Lalmuanpuii Vuite nih, “keimah hi Halar Nay Tial ka si. Myanmar Chin ka si i kum 25 ka si. CCTV phen ah a cangmi biatak ka ttialmi hi a dongh tiang rel ulaw thil sining taktak nan hngalh lai. Mi vialte an lungfian nak hnga zaangfah tein ka Share piak cio uh…” tiin a leh ve.

Coka ah towel lawngin ka ummi le thil pan tete kaa hruknak aruang cu…ka hmet law relchap

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.