Chin nu nih bomb aa lamhsual i a thi

Chin state, Paletwa peng i Nga Ting khuami Pi Phit Leih, kum 28 cu September 20 ahkhan ramtang ah tolreba a kawl lio ah bomb hmanhmi aa lamhsual i a nunnak liam.

Pi Phit Leih le a hawile 5 hna cu khua in minutes 30 kal hrawng a hlatnak ah tolreba an kawl hna. Aho si hngalh lomi nih an rak hmanhmi bomb cu Pi Phit Leih nih aa lamhsual i a thih hi si, tiah Khumi Media Group nih a ttial.

Pi Phit Leih nih kum 5 te lawng a si rihmi a fanu a liam tak.

Bomb aa lamhsualnak hmun cu Myanmar le Bangladesh ramri a si i AA Ralkap pawl an tlonlennak a si. Nain, bomb hi AA hmanhmi maw si Kawl Ralkap hmanhmi dah ti cu hngalh a si lo.

“Bawmh hmanh an hmanmi hi cu ttihnung tuk hringhran. Hriamtlai pakhat le khat i khamnak caah bomb an hmanhmi i lamhsual in sualnak ngei lo khuami an thih hi cu ka lung ttha bak lo, a thimi chungkhar hi cozah nih zeitin dek bawm hna sehlaw a ttha,” tiah Khumi Media Group editor nih a chim.

Chin state, Paletwa peng ah, kum 2015 hnu in Rakhine Ralkap (AA) le Kawl Ralkap an i kah ruangah a zaam khuami a zaza cu nihin tiang an khua an kir kho rih lo. — Khumi Media Group le Khonumthung

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.