Chin nu cu a boss Singapore nu nih Facebook ah a thangchiat

Chin nu: CCTV video phen i biatak. A dihlak in rel ulaw thil dik nan hngalh lai.

Zaangfah tein ka Share piak cio uh, mikip an lungfiannak hnga.

Singapore boss nu nih online ah a thangchiat caah Chin nu nih a lehmi si – a boss nu nih a thangchiatmi rel na duh cun ka hmet law rel khawh si.

Ka min cu Halar Nay Tial a si. Myanmar Chin ka si i kum 25 ka si. Ka chuah nithla cu 12 January 1993 a si.

Singapore ka kalnak le thil sining

Ka chungkhar bawmh ka duh caah 2016 ahkhan Singapore ram ah sinum ttuan dingin ka kal.

‘Amma’ timi tar nu ka rak zohkhenh. Dinh ni ka rak ngei bal lo, phone zong ka rak tawng kho lo. Amma cu a thluak tlamtling lomi sikaw midang velh a hmang. Keimah zong aa ka velh ve. Thla 4 fai ka ttuan nain mithar ka si bang Singapore ram ah zeihmanh ka hngal lo i ka thinphang.

Puaisa sinah, boss dang sinah ka tthial ka ti.

Mah hnu ah a ttha tukmi India miphun boss sinah ka phan i nuam tein ka ttuan. Nain vanchiat ah, a sin i thla 5 ka ttuan ahhin Myanmar ram i ka ttapa accident a tong i a ke aa khawng ti thawngpang chia ka theih. Atu tiang a ke bei.

Mah lio ahcun Myanmar ram kan inn ah ka tlung. Ramdang ah ka kal ti lai lo tiin ka lung kaa thlek. Nain, sifah cang cun tangka ka herh ruangah kum 1 hnu ah Singapore ka ra tthan.

Taluk nu sinah ka ttuan. A ttha ngai nain Mirang holh a thiam lo caah le kei zong Mandarin holh ka thiam lo caah kan i chim chawn kho tuk lo. Thla 1 chung keimah tein Mandarin holh ka cawng nain kaa herh tuk caah ‘boss dang sinah ka tthial’ tiah puaisa ka chimh tthan.

Amy Tree sinah ka ttuan

Mah hnu cun mah Amy Tree sin ahhin ka ttuan. Amah nakin a ttha deuhmi boss thar kaa hmuh i tthial kaa timh hnu, naite ah Amy Tree nih ‘ka vapa horduhcuai in a lor..‘ tiin keimah sual phawtnak kong a tar.

Amy Tree sinah ka ttuanmi hi ‘phone na hmang kho lai, na leiba na cham dih tik thla 4 hnu ahcun thla fatin ni 1 peng dinh ni na ngei lai, an innkhaan a hlangmi India miphun pakhat na bawmh pah lai’ ti lungtlin hnatlaknak he kaa thokmi a si.

Amy Tree sin thla 1 ka ttuan hnu ah fate a ngei.

Ka ttuan ka zarh 1 chung cu an ttha tuk i zeizong vialte an ttha dih. Zarh 2nk in cun sumsikhak le semrel phun in an um.

Malit nak kong

Nau a pawi i a paw nganpi he si caah a ba tukmi a lo… mah ruang cun nau na ngeih hlan cu kaa manh caan ah kan malit lai, ka ti. ‘Elaw’ a ti.

Ni fatin rawl ka chuan hlan le rian ka lim hnu ah ka malit peng i zaanttim 11pm le 12am tiang peng ka malit.

Zarh 5nk hrawngah, naa manh caan ah na umhar ahcun hla hna ngai ko aa ka ti i ka phone aa ka pek. 10pm le 11pm hrawngah rian ka dih tawn. Mah hnu ah kaa kholh i 12am tiang ka malit peng.

A caan cun chun zongah rian ka lim ahcun ‘ka malit’ aa ka ti i ka malit.

Ni khat cu ka malit lio ah kaa hngilh. Mah hnu cun ka malit caan ah movie zoh awk aa ka pek. Hnu ahcun movie zoh awk aa ka pek hnu ah malit aa ka fial peng.

Fa na ngeih hlan kan malit lai ka rak timi si, nain fa a ngeih hnu zongah malit aa ka fial peng. Voi 1 te malit nak dawr ah kal dingin caan a lak nain aa let tthan i keimah peng malit aa ka fial.

Manlo malit tu ah aa ka hman. Ka kut a phing dihmi ka piah zongah zei a rel lo, malit aa ka fial peng tthiam.

Singapore pa a rummi vat i zuam aa ka ti

Ka malit caan ahhin ‘mirum Singapore pa va, kaan bawmh lai, ka hawile zong ka bawm ve uh ka ti hna’ tiin ruahnak aa ka ceuh tawn.

Nain, ttha tein ka al, sinum ceo ka si pinah ka nulepa nih kan rammi lawng vat an duh caah kei cu kan ram pa lawng ka vat khawh hna lai, ka ti.

Na nulepa nih cun an vat ttung lai lo, nangmah nih pei na vat ko lai cu, aa ka ti.

China ram khuate in a rami nu tampi zong nih a rummi Singapore pa an vat cio ko, i zuam phot ko, aa ka ti.

Atu ahcun amah lila nih ‘Singapore pa vat a duh..’ tiin sual aa ka phawt.

A vapa horduhcuai in ka lor bal lo

Boss pa (Amy Tree a vapa) horduhcuai in ka lor bal lo. Amy Tree nih aa ttamh aa ka timi zong hi amah nih ttamhnak aa ka pekmi si.

Amy Tree hrim nih amah lungtho in a ttamhnak tlawmpal le mittlang suainak aa ka pek. Mah zong cu aa ka hal tthan caah an inn in ka kal lai ah ka khirh ta.

Aa ka pekmi cheukhat cu a tat-ttan dih cangmi an si caah ka hlonh hna i a taangmi lawng ka khirh.

Rawl ei kong

Anhringso le sa tiin meh phun 2 kan chuan tawn. Thla 1nk ahcun kan dihlak kan ei tti hna nain Amy Tree zia ruangah khim tein ka ei ngam bal lo.

Fa a ngeih hnu cun, breakfast dah lo anmah hnu pengah keimah lawngin ka ei.

Zingka a thawh caan aa khat bal lo. Kei nih le zingka tuan ah ka rian ttuan a hauh caah breakfast cu anmah hlan ah ka ei i rian ka ttuan tawn. ‘Sinum na si nain kanmah hlan ah na ei..’ aa ka ti. Thil sining ka chimh nain ‘ka let hlah’ aa ka ti.

Mah ruang cun ka dai i anmah hlan ah breakfast zong ka ei ti lo. Amah hoi hna cu 11am hnu pengah a tho nain mah tiang ahcun breakfast zong ei loin rian ka ttuan peng.

Breakfast ka ei ahcun chuncaw chuan a za tawn.  Hnu ah ruah lo piin ‘kanmah hlan ah ei ko’ aa ka ti tthan. “Nanmah hnu ah ka ei ko lai” ka ti nain a hmai chiapi he aa ka zoh caah ka ttih i anmah hlan ah ka ei tthan.

“Kanmah hlan ah breakfast a ei pengmi CCTV video cu palek ka piah hna..” a timi hrim cu ka khuaruahhar. Chim awk zong ka hngal lo, ka aar ko.

Aa ka velh

A lungtluan lo paoh ah an ihnak khaan ah aa ka auh i aa ka sik tawn. Kan biaruah a tluan lo ahcun ka hmai ah aa ka bengh tawn. An ihnak khaan ah CCTV a umlo caah an ihnak khan chung lawngah aa ka bengh tawn.

Nain, October 10 zaanlei ahkhan CCTV a ummi a philh i coka ah aa ka bengh sual.

Mah cu ka cauk ah kaa ttial i inn ah palek an rat lio ah ka piah hna. A thin hung tuk i a thaizing ah ka cauk tlawmpal a thleh. Atu hi ka cauk cu a um rih ko. Mah lio ahcun a hawinu Lisa zong a um ve. CCTV zong nih video a thlak ko nain Amy Tree nih a post ngam lo.

Ka cauk a thleh lio ahcun ‘mahti hin na tuah kho lo…’ tiah ka nawl nain ‘ka inn si, ka tuah khawh..’ aa ka ti.

Thong kan thlak lai aa ka ti

Mah hlan ahhin, an ihnak khaan chungah aa ka sik i ‘mahti ning cun nan sinah sau ka ttuan kho lai lo..’ ka ti i aa ka tlerh.

Atu ka vapa ka vat hlan ahhin catang sang ngaimi tlangval ka rak ngei, zei hmanh phungninglo thil a tuah lo nain keimah nih phiat ka duh cang caah ‘tuanbia pakhat ka ttawn’ i thong ka thlak ko. Nangmah thongthlak hi aa harh lai tiin ruat hlah, sinum ceo dawh na si hih, zeitik paoh ah kan thlak khawh, aa ka ti.

Ka duh ahcun ‘tuanbia pakhat ka ttawn’ lai i Singapore ram ah rianttuan kho lo ding zongin kan tuah khawh, a ti.

Na duhmi paoh kha tuah ko, thil ttha lo ka tuah lo paoh cun ka ttih lo, mahti hin ka tlerh hlah mu! ka ti.

Palek nih ka sualnak an hmuh lo caah an kir

An hnem tuk, an chim tam tuk, zunput ka kal, rawl ka ei, rawl ka chuanmi le thil ka sukmi tiang in an tuak dih caah a huaha lomi siknak tam tuk a chuahter, mah ruang cun kaa nuam lo. Nain, Amy Tree hi a zer tuk i bia hi a bingtalet in a thlen dih.

Ka hmai ahcun a holh kho lo, palek a chawnh hna lio zongah palek nih ka sualnak zeihmanh an hmuh lo caah tlaih loin an kir.

Ka puaisa zung zongah a ra i a sin ah rianttuan dingin nu thar tampi interview a tuah hna, nain ka puaisa pawl nih a zia chiat tukmi an hngalh… puaisa zung CCTV zongah a um dih ko.

Shampoo le chapiat tatt-tan a dih cangmi aa ka pek ruangah hnu ah keimah tein kaa cawk dihmi a si. Ka cawkpiak a timi khi a lih lawngte si. Din awk cawhnuk zong keimah tein kaa cawk.

Towel lawngin coka ah ka ummi kong

Kaa kholh tanttim ah, ka boss nu (Amy Tree) nih ‘sa na chuan hlan ah ciah hmasa aa ka timi pei ka philh cu..’ ti kaa thei. Aa ka fialmi hi a biapi bikin ka ruah caah kaa kholh liopi a si zongah ka chuak i rianrang tein ka tuahta hnu ah ti kholhnak ah ka lut tthan.

Amah ka upat ruangah keimah kong pakhat hmanh ruat loin rian ka ttuanmi hi bantukin a lingtalet in tuanbia a ttawn dih cu ka ngaihchia tuk.

Cun, sexy thil hruk kong – ‘thil hruk ning sikaan naa ka khiahpiak lai lo maw?’ tiah ka hal i ‘apoi lo, na siaremmi paoh kha i hruk ko’ aa ka ti caah kaa hrukmi a si.

Ka malit lio zongah ‘ka khua lin tuk i..’ tiah ka chimh i ‘kha bantuk thil hruk cu apoi naisai lo, na duhmi paoh i hruk ko – mei man na heu tuk lo paoh ahcun adang cu zeihmanh a poi lo, na khua linh ahcun pangka hman loin thlalangawng hong’ a timi si.

“Kanmah boss nih zeihmanh kan chim lo paoh ahcun sinum nih zeihmanh nan i palhmi a um lo tinak si. Khuacaan sining hoih in thil cu sia a remmi paoh i hruk ko” aa ka timi si.

Mi vialte cu Amy Tree nih fawi tukin a hlen dih hna. Ka caah a fak ngai, a lau zong ka lau! Ka boss nu le boss pa kan upatmi hna vialte khuazei dah tlau? Nan catang lengluang cu khuazei dah nan chiah? Upat awktlak boss le minung nan sinak khuazei dah um?

Sinum ka palh ahcun, zei ruangah boss nih CCTV video tling tein a tar ngam lo? A duhnak zawn lawng a tar? October 10 zaanlei ah na sinum nu na velh lio le na inn hlangtu India mi a um lio ah bawngbi chungnawh le bawli lawngin na inn chungah fashion show na piah lio CCTV video kha khuazei dah um tiah Amy Tree kha va hal uh.

Thil ttha lo tuah kong ka ruah bal lo ruangah le a chim ning bang horduhcuai in a vapa lor ka timh bal lo ruangah aa ka tlerhmi ka ttih lo. Atu ah online ah lih in aa ka thangchiat.

Amy Tree ruangah boss thar nih aa ka cohlan cangmi aa let tthan

October 23 ahkhan boss thar kaa hmuhmi sinah kal ding ka si nain Amy Tree nih lih hrokhrawl tuanbia a ttawnmi cu ka boss thar nih a hmuh caah aa ka cohlang duh ti lo.

Amah bantukin online ah mi thangchiat len hi ka duh lo nain mi tampi nih ‘thil dik theih kan duh, nangmah lei in rak ttial ve’ an ka ti caah le keimah bantuk sinum zong hi minung kan si ve bang mi nih biatak an theih a herh ko ka ti caah ka ttialmi hi si.

Theihternak: A sau tuk caah a biapi deuh kan timi tete lawng kan leh. A duhmi nih kaa hin Caroline Lalmuanpuii Vuite nih a ttialmi rel khawh si.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.