Chin party 3 an i fonh taktak cang

September 29 ah Chin party 3; CNDP, CPP le CLD i fonh minsen thutnak cu Yangon ah an tuah cang. An i fonhnak party cu CNLD (Chin National League for Democracy) tiah an auh.

Federal democracy rampi dirh khawhnak ding, tlukruannak le mahte khuakhan lairelnak ngah khawhnak dingah hmual ngei deuh in kan i tel i rian kan ttuan khawhnak hnga CNDP, CPP le CLD hi i fonh usih kan tinak si, tiah thawngthanhnak ca chungah an ttial.

“Chin mipi duhnak le Chin miphun dihlak lungrualnak, federal democracy rampi dirhnak kong kha biapi ah chia in party phungphai, tinhmi le hmailei rianttuan ding pawl kan khaan dih hnu ah a um ciami party i fonh usih law CNLD – Chin National League for Democracy tiin dir usih tiah paty 3 lungrual tein kan lungtling.”

“Cucaah, Chin miphun dihlak caah fek tein dir i rianttuan dingin CNLD dirh ding le a hmunmi party si dingin ‘Fonh Lungtlin Biakamnak Ca’ cu 2018 September 29 ah minsen kan thut hna,” tiah thawng an thanh.

Chin party 3 an i fonhnak thawngthanh
Chin party 3 an i fonhnak thawngthanh

Chin party 5 leng an taang rih

Chin party pical 3 cu an i fonh cang nain amah dang cio in a dirmi Chin party 5 leng an taang rih. Amah dang cio in a dirmi Chin party hna cu;

  1. Zomi Congress for Democracy (ZCD)
  2. Asho Chin National Party (ACNP)
  3. Ethnic National Development Party (ENDP)
  4. Khumi/Khami National Party (KNP)
  5. Zo National Region Development Party (ZNRDP)
  6. Chin Indigenous Party
  7. Mro National Party ( MNP) le
  8. Khami National Development Party ( KNDP) hna an si.

Chin Indigenous Party (ဌာေနခ်င္းတုိင္းရင္းသားပါတီ) cu September 29 ah Magway ramtthen i Aunglan khuapi ah an dirh tharmi a si.

(7) MNP le (8) KNDP cu Rakhine state ah a ummi Chin party an si. Chin state ahcun an lang tuk lo.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.