Chin party nih Matupi ah teinak a hmuh cang

Matupi peng i Chin state Hlutdaw palai thimnak ah Chin League for Democracy (CLD) in aa cuhmi Salai Aung Lian nih teinak a hmuh cang.

CLD party secretary Salai Aung Ling nih, “atu cu khuate 4 lawng vote rel ding a taang cang. Khuate 4 ahhin vote a thla khomi 700 lawng an um. 700 chung zong ahcun kanmah vote aa tel ve lai si kaw, kanmah nih teinak kan hmuh ko cang,” tiah a chim.

Matupi peng ahhin Vote Zung 70 a um. Mah chungah 66 an rel cang i CLD nih vote 969 in NLD a hruai lio a si;

  • CLD = 5226
  • NLD = 4257

Matupi peng ahcun CLD le NLD lawng an i cuh.

CLD in teinak a hmutu Salai Aung Lian cu kum 31 a si. 1987 January 21 ah Matupi peng ah a rak chuak.

2010 ah University of Pakokko in Mechanical Engineer (B.Tech) degree a ngah. Mother Industrial Co.,Ltd ah Plant Manager a rak ttuan bal.

Atu cu Travel and Tour Co.,Ltd ah manager a ttuan lio a si.

Matupi peng ah NLD in aa cuhmi cu U Aung Thang a si.

Kanpetlet peng balte ahcun Chin party an tluang lo ngai. Vote Zung 69 a ummi chungah 58 a fiang cang i NLD nih vote 450 lengin CNDP a hruai lio a si;

  • NLD = 2753
  • CDP = 2298
  • USDP = 2273
  • CPP = 191

Vote Zung 11 a taang rih ko nain NLD le USDP an tthawnnak hmun a si caah ruahchannak a tlawm ko.

Nain, Chin party 3; CNDP, CLD le CPP cu party pakhat CNLD ah an i fonh cang caah Matupi peng i CLD nih teinak a hmuhmi cu CNLD teinak a si.

Caankarlak Thimnak ah aa cuh ding min cazin rak pek lio ahhin Chin party 3 an rak i fonh kho rih lo. September thla ceo ah an i fonh khawh caah hmasa min an rak pek ningin an i cuhnak a si. Atu ahcun party pakhat an si cang hna.

Rampi Remdaih Khuakhannak (21st Century Panglong Conference) ah Chin party CNLD aa tel kho ve cang lai. — Zalen

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.