Chin ralzaam 300 leng nih UNHCR Delhi ah duhlonak an langhter

Delhi – UNHCR nih hlawtnak interview a tuah thluahmah cang hna caah Chin ralzaam 300 leng nih nizaan January 16 le tuni 17 ah UNHCR zung hmai ah duhlonak an langhter.

Ramdang zohkhenhnak kan herh rih, kir caan acu rih lo, nanmah zohkhenhnak kan herh, tbk., catar pawl an i put i UNHCR zung hmai ah an dir hna.

Chin ralzaam paoh cu UNHCR nih a auh hna i thim awk 2 chungah nan duhmi i thim uh a ti hna. Thim awk 2 hna cu;

  1. ‘Ralzaam zohkhenhnak ka herh ti lo’ tiah min thut i interview phit loin 2019 Dec 31 tiang a nungmi UN card pek. Mah hnu in hlawt thai ding, le
  2. Ralzaam zohkhenhnak ka herh rih ko na ti ahcun ‘interview phit ka duh’ tiin thla 2 chungah phitter. Na sungh ahcun UN card chuh in hlawt colh ding, hna an si – 2nk hi Delhi um Chinmi tam deuh nih an i thim hna.

“UNHCR nih Chin ralzaam donghter dingin bia na khiahmi hi kan lungtling hrimhrim lo. Hramhram in na kan kirter bak a si. Atu lio Myanmar ram hi Ramkip Ralzaam Upadi bang ‘him te le limhang ngei tein kir’ nak ttha a si rih lo,” tiah cathluan zong an chuah.

Ramdang Zohkhenhnak Kan Herh. Kan ralzaam sinak kan sauhpiak rih uh. Himnak le Zohkhenh Kan Herh

“Myanmar cozah zong nih rak kir ko hna seh, an him ko lai tiah zapi theih in thawng a thanh rih lo. Him te le limhang ngei tein nan kir ko lai tiah UNHCR le Myanmar cozah nih aamahkhannak a um hlan poah cu, hnek chom in kirter kan duh hrimhrim lo.”

“Chin National Front (CNF) le Kawl Ralkap kar zongah zungzal kahngol hnatlaknak taktak a umlo, hriamnam an chiah in himnak phungphai an remh hlan lo paoh cu a taktak si lo caah Chin state ah zeitik paoh ah aa kap khomi an si.”

Cathluan tling tein rel a duhmi caah. Atangah a peh um.

“Chin state, Paletwa peng zongah kum 2015 thokin Kawl Ralkap le AA an i kap lengmang i a zual chin lengmang. Khuami tampi harnak an tong. Mah ruang cun kirnak dingah a himlo.”

“Kawl Ralkap nih an tuahmi 2008 Phunghram ruangah Ralkap nih a biapi tukmi uknak zung pawl; Ramchung Zohkhenhnak, Runven/Ralkap Zohkhenhnak le Lahwahkah/Ramri Zohkhenhnak Zung pawl hi an tlaih peng rih. Mah phunghram ruang ahhin, Myanmar ram cu mipi thimmi cozah nih a uk thlu naisai rih lo i tlangcungmi hna nih mahte-khuakhan lairel khawhnak federal ram he aa hlat tuk rih.”

“Myanmar cozah nih ramdang sianginn certificate le degree a cohlan lo caah Chin ngakchia hna hi Kawlram ah sianginn an kai kho ti lai lo. Sianginn a dih cangmi le Delhi ah master degree tiang hmanh a ngah cangmi pawl zong hi cozah zungah rian an ttuan kho lai lo. Mah zong hi UNHCR nih Myanmar cozah na ton hau.”

“A kirmi $200 kan in pek hna lai nan timi zong hi kirnak fangfang lawng a zawh. Chin ralzaam tam deuh cu Chin state ah zei taktak hmanh an ngei ti lo. Mah tangka nih cun inn hlannak, inn hmun cawknak, sianginn kainak le rian khawlnak pakhat hmanh a bawm lai lo.”

“Cucaah;

  1. Number 2nk aa thimmi pawl kha avoi 2nk interview tuah loin card kan pe dih. Aho taktak hmanh card kan chut hlah.”
  2. Chin ralzaam caah ramdang zohkhenhnak pehzul rih. Number 2 aa thimmi kha UNHCR bawmhnak tangka aa ruahchanmi hohmanh kan um lo. UNHCR zohkhenhnak le card ngah tu kan i ruahchanmi a si, tangka a si lo.
  3. UNHCR nih Chin ralzaam caah ramdang zohkhenhnak na donghter ahcun, Chin ralzaam hna India ram ah him tein kan um khawhnak hnga India cozah na kan tonpiak a herh.
  4. Atu ning tein UNHCR nih card na kan chuh taktak ahcun, him tein kan um khawhnak hnga India cozah sin in aamahkhannak na kan lak piak colh a herh,” tiah cathluan an chuah.
Cathluan a peh
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.