Chin ralzaam bu nih a lungtlinlonak kong a chim lai

Tu zaanlei 4pm ah Chin ralzaam bu, UNHCR, Malaysia cozah le NGO tiin Chin ralzaam kong ceihnak an ngei lai.

Malaysia media nganbik The Star (R.Age) nih atu lio Chin ralzaam sining video a thlakmi “Refugees No More” cu Kuala Lumpur i Methodist College ah an piah lai i a dih in a cunglei langhtermi pawl cu biaruahnak an ngei lai.

Mah tikah Chin ralzaam bu nih, UNHCR nih Chin ralzaam a donghter thluahmahmi a lungtlinlonak kong a chim lai.

Biachimtu hna cu;

  • ACR Chairman Mung Khat
  • UNHCR Malaysia Lutlai Richard Towle
  • Malaysia Lahwahkah hruaitu Saravana Kumar Marimuthu le
  • NGO (Refuge for Refugees) dirhtu Heidy Quah hna an si lai.

Chin ralzaam tuarnak video a thlatu The Star (R.AGE) lutlai changtu Ian Yee nih, “mah hi Chin ralzaam le anmah he aa pehtlaimi bu pawl biaruahnak caah kan tuahmi a si,” a ti.

“UNHCR le Malaysia cozah nih Chin ralzaam cungah zei bantuk lungput dah an ngeih ti le ralzaam kong cu ka hngalh ko.”

“Nain, lungdongh tuk ruangah mahlemah nunnak lak aa timmi hna an um cang ahcun, biaruahnak tal cu tuah hrimhrim a herh,” a ti.

Hlawt dingin a konglam zohpiak cuahmahmi Chin ralzaam le ralzaam-soktu 30,000 leng an um, tiah UNHCR nih a chim.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.