UNHCR nih Malaysia um Chin ralzaam hlawt dingin bia na khiahmi hi na ruah tthan in na leet awk a si, tiah Chin zatlang bu nih Yangon um UNHCR rianttuan pawl an chimh hna.

Nizaan November 24 ah UNHCR rianttuan pawl le Yangon um Chin zatlang bu hruaitu hna cu UNHCR Yangon zung ah suimilaam 3 chung tonbiaruahnak kan ngei, tiah Chin zatlang bu pawl nih an chim.

“UNHCR nih amah duhnak pi lawngin Chin ralzaam hlawt a timhmi hi a lamkip in ruah tthan le leet a herhnak kong cu Chin Nuhrin Covo Bu (CHRO) le Chin Ralzaam Bawmtu Bu (CRSC) nih kan chim,” tiah CRSC chungttuan Chan Lian nih a chim.

“Mah pinah, ramkip zohkhenhnak a herh tuk liomi Malaysia um Chin ralzaam le ralzaam-soktu hna limhang, thinlung le taksa himnak caah nuhrin covo le minung zawnruahnak tahfung ningin nan zohkhenh hna rih a herh ko tiin kan forhfial hna,” tiah a chimchap.

“Malaysia um Chin ralzaam hna cu ramkip zohkhenhnak nan herh ti lo. Cucaah 2018 August thokin nan ralzaam sinak donghter hram ka thok cang lai,” tiah UNHCR nih June thla ah thawng a rak thanh.

A thawngthanh bang, UNHCR nih 2018 August thla thokin Chin ralzaam hlawt/donghter a thok cang. UNHCR zungah card/catlap thleng dingin a kalmi paoh cu thim awk 2;

  1. Interview phit loin 2019 Dec 31 tiang card sauhpiak i January 1, 2020 thokin ralzaam in hlawt thai, maw na duh deuh? Asiloah
  2. Interview phit i thla 2 chungah na sungh/awn chimh, na sungh ahcun ralzaam in hlawt beh, dah na duh? tiah a hal thluahmah cang hna. An i thimmi hoih in card le catlap a pek hna.

“Myanmar ram i hmun cheukhat cu a dai rih lo nain, Chin state cu atu hi a dairem cang i ralzaam zohkhenhnak mit in cuanh tikah zumh awktlak in a him cang caah Chinmi hna cu Myanmar cozah zohkhenhnak tangah him tein nan um kho cang lai,” tiah UNHCR nih a rak chim.

“Tutan kan meeting cu, Chin ralzaam kong he pehtlai in kan hmuhning hal dingin Yangon um UNHCR zung nih a kan auhmi si. A pipa ngai in i tonmi a si leemlo. Yangon um UNHCR zong nih anmah nawl in Chin ralzaam kong bia an khiak kho lo. Anmah zong nih, ‘tuni kan i tonmi hna cu khat le khat hmuhning i ruahnak le Myanmar ram um Chin hruaitu hna nan ruahning laknak sawhsawh a si’ an ti,” tiah Chan Lian nih a chim.

Chin miphun thengte lawng hlawt dingin UNHCR nih thawng na thanh ruangah Malaysia um Chin ralzaam hna cu an lungrethei tuk i nungak pakhat telh in Chin ralzaam cheukhat zong anmah tein an i that ti theih a si caah Malaysia um Chin ralzaam kong hi lungrethei tuk a si, tiah Chin Ralzaam Bawmtu Bu (CRSC) nih October thla ah cathluan a rak chuah.

Malaysia ramah Chin ralzaam le ralzaam-soktu 30,000 leng an um, tiah Chin zatlang bu pawl nih an chim. — 7Day Daily

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.