Pu Zo Tum Hmung nih UNHCR Malaysia lutlai Richard Towle a ton lai

Zo Tum Hmung: August 20 zaanlei ah UNHCR Malaysia lutlai Richard Towle he kan i tong lai. UNHCR nih June 13 ah Chin ralzaam hlawt dingin cathluan a chuahmi a dik lonak kong, remh le leet a herhnak kong, Chinmi kir awk kan tthat lonak kong le adang tampi ka chim lai.

UNHCR cathluan chuahmi i catlaangtthen 2nk ah ‘nan ram a ttha cang..’ a timi hrim hi a palh cikcek. Remh hrimhrim a herh. Thaizing ah mah kong hi biatak tein ka chimh lai.

US ka kir cangka in US cozah zong ka ton lai.

Chin le adang tlangcungmi ralzaam kong hi Kum Zabu 21nk Panglong Khuakhannak ah tlangcung hriamtlai bu vialte, ramkhel party, Kawl cozah le ralkap he kan ceihte ding a si. Mah hnu lawngah kir/lo nak kong cu a fiangte lai.

Mah hlan ah UNHCR nih ‘Chin state a ttha cang, ralzaam zohkhenhnak nan herh ti lo, va tlung cang uh’ a timi hi a dik hrimhrim lo. UN policy le ramkip hnatlakmi upadi (international law) a buar si.

Cucaah, kum Zabu 21nk Panglong Khuakhannak a tlamtlin dih hlan paoh cu UNHCR nih voi dang bantuk tein ra kan zohkhenh peng ko uh ka ti lai.

Pu Zo Tum Hmung cu, Guam ah aa rak tapmi Chin miphun tampi hna US ram an phanh khawhnak dingah biatak tein a rak cawlcaangmi le nihin tiang Chin miphun caah a lamkip in rian a ttuan pengmi a si.

Chin miphun le ram nih Kawl uknak chungin luat i mahte in i uknak le zalennak a hmuh khawhnak dingah fak piin aa zuammi CNF ah adviser zong a si.

August 13 in 15 tiang tuahmi Chin Ralzaam Kong Khuakhannak zongah i tel ve dingin ICC hruaitu hna nih an sawm nain a dam lo caah a ra kho lo.

A dam thlu rih lo nain Chin ralzaam hna kongah a lungretheih tuk caah nizaan kha Malaysia a rak phan. Thai zaan ah US a kir tthan lai.

August 19 zaanlei 4pm in 7pm tiang Senthang biakinn ah ICC sawmmi upa le Chin mipi tonnak a um, minung 100 leng an kai kho. Nain, media ah ttial awk a ttha rih lomi a tam.

“ICC hruaitu hna nih ‘aza’ kan ti tikah Chin mipi le media sinah tlamtling tein thawngthanhnak kan tuah tthan te lai,” tiah ICC le FRO Chairman Pu John Bawi nih a chim.

–TheChinExpress website kan remh lio si caah Theihtlei kan hman chung

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.

Zeitin na ruah?

Zaangfah na comment ṭial!
Zaangfah tein ka hin a min ṭial