Chin ralzaam ngakchia nih Christmas hlasa in Malaysia sifak le tar caah RM25,000 leng an chuahpi

Malaysia – Chin ralzaam ngakchia hna nih Malaysia sifak ngakchia le tar caah Christmas hla sa in tlawm an halpiak hna i ni 3 chungah RM25,000 (9.3 million kyats) an hmuhpiak cang hna.

Zotung Refugee Catholic Learning Centre (ZRCLC) ah sianginn a kaimi Chin ngakchia 30 hna cu an saya/ma hruainak in Malaysia rammi le ramdangmi sinah Christmas hla an sa.

Inn ngeitu pumpak le Corporate Zatlang Bawmhnak (CSR) program a tuahtu company le bu pawl nih an sawm hna i Christmas hla an va sakpiak hna.

Cutin an hmuhmi laksawng tangka RM25,000 leng cu Malaysia rammi sifak ngakchia le tar bawmtu bu Montfort Boys Town le Little Sisters of The Poor sinah acheu veve in an hlut hna.

Chin ralzaam ngakchia hna PJ Midtown Sales Office ah Christmas hla an sak lio

“Atu hi kan ngol rih lo. Tu hnu ah kan hmuh rih te ding tangka zong a dihlak in mah bu 2 ahhin acheu veve kan hlut rihte hna lai,” tiah Bawi Tin Sui, ZRCLC sayama sin in kan theih.

“Company Zatlang Bawmhnak (CSR) caah tiin En Yun Old Folks Home ah Christmas puai kan tuah. Christmas hla/carol sa dingin ho te dah kan sawm hna ah a tthat lai ti kan ruah lio ah Zotung-RCLC ngakchia kong kan theih,” tiah PJ Midtown i general manager Chow Mei Yoke nih a chim.

“Voi 1 ah mi tam deuh kan bawmh khawh hna lai cuta. Caanttha tuk a si. Puai a rami minung 250 leng zong nih ralzaam hngakchia hna an i zuamnak hmu ve hna sehlaw tha pe ve hna seh tiin ZRCLC ngakchia pawl cu Christmas hla sa dingin kan sawm hna,” a ti.

Christmas hlasaknak ah guitar a tummi ZRCLC siangngakchia Aung Za Bawi (kum 12) nih, “mah hlan hin cun hlasak in mi kan bawmh khawh hna lai ti ka rak ruat bal lo,” tiah nizaan ah aa lawmhnak a chim.

“Kum 60 leng ka si cang nain anmah bantuk Christmas hla sa hi ka hmu bal hna lo. Santlai lo dirhmun ah an um buin thinlung thianghlim te he ruahchannak hla an sakmi nih ka nun a suk tuk. Santlai lo, mitlau le ngakchia hna sinah Pathian a rak um hrim ko,” tiah Mildred Lopez, Chin ralzaam ngakchia hna a inn ah Christmas hlasa dingin a sawm hna i a innpa zong ra ve uh a titu nih a chim.

“Tutan Christmas hlasa in Malaysia rammi sifak santlai lo caah bawmh kan halnak ahhin siangngakchia upa deuh 30 an i tel kho. ZRCLC siangngakchia hi an dihlak 56 an si. Kum 4 in 13 karlak an si hna. Saya/ma 6 kan um. Chin sayama 3 kan si i adang 3 cu England, Singapore le Malaysia rammi an si,” tiah samaya Bawi Tin Sui sin in kan theih.

“Christmas hla sak le drama piah a kan sawmtu sinah kalnak tangka hmanh kan ngei lo nain, hnu ah umkalnak a kan hlutu/sponsor an um. Mah ruangah Christmas carol le drama in kan hmuhmi tangka cu a dihlak (100%) in Malaysia rammi sifak ngakchia le tar caah kan hlut khawhnak a si,” a ti.

ZRCLC sianginn cu kum 2008 ah dirhmi a si. An sianginn hlan man, siangngakchia textbook le saya/ma eidin ti bantuk a herhmi vialte cu Zotung khrihfabu le ramdangmi bawmhnak lawngte in pek dih a si.

Hi bantukin bawmh chom a haumi nih an thiammi le an ti khawhmi tein sifak santlai lo dang bawmh an i thawh vemi hmuh cu aa dawh tuk hringhran.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.