Delhi um Chin ralzaam pawl nih January 16 in 18 tiang, ni 3 chung a pehpeh in UNHCR zung hmai ah duhlonak kan langhter lai, tiah CHRO in Salai Cung Dawt nih a chim.

“Tutan duhlonak kan langhter ning cu hlan bantuk a si lai lo. UNHCR zung hmai ah kan dir lai. Ni khat lawng si lo, ni 3 chung a si lai.”

“Cutin duhlonak kan langhter tikah palek le rammi nih harnak a kan pek lo ahcun kan duhmi kan ngah hlan lo duhlonak kan langhter peng lai.”

“Zarh 1 chung zong a si kho. Zarh 2 chung zong a si kho.”

“UNHCR nih Chin ralzaam paoh cu thim awk 2 a pek hna. 2018 dongh lai ah a auhmi hna paoh (99%) cu 2nak an i thim dih. February ah avoi 2nk interview phit ter an si lai,” tiah a chimchap.

Chin ralzaam paoh cu UNHCR nih a auh hna i thim awk 2 chungah nan duhmi i thim uh a ti hna. Thim awk 2 hna cu;

  1. ‘Ralzaam zohkhenhnak ka herh ti lo’ tiah min thut i interview phit loin 2019 Dec 31 tiang a nungmi UN card pek. Mah hnu in hlawt thai ding, le
  2. Ralzaam zohkhenhnak ka herh rih ko na ti ahcun ‘interview phit ka duh’ tiin thla 2 chungah phitter. Na sungh ahcun UN card chuh in hlawt colh ding, hna an si – 2nk hi Delhi um Chinmi tam deuh nih an i thim hna.

“Interview an sungh ahcun UN card chuh ding an si cang. Mah cu duhlonak langhter in ‘UN card kan sauhpiak rih’ tiah nawl kan duh.”

“Myanmar ram hi kanmah nih kan hngalh khawh tawk ahcun a him thlu rih lo. Myanmar ram kir duh lo si loin kir ngam lo tu a si. Mah ruang cun, avoi 2nk interview phit ter hna loin direct in UN card sauhpiak dih hna dingin UN zung hmai ah duhnak langhter kan i timh hi si,” tiah Salai Cung Dawt nih a peh.

Duhlo-langhternak ahcun minung 300 hrawng i tel kho dingin an timh lio a si. Ni 3 chung an langhter hnu ah a herh rih ko an ti ahcun Chin hruaitu hna nih a thar in khua an khan tthan te lai. — Khonumthung

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.