UNHCR- Chin ralzaam pawl hi Malaysia cozah nih rianttuannak nawl pe hna
  • Chin ralzaam hna cu 2019 kum dongh ahcun UNHCR nih hlawt hrimhrim ding – UNHCR
  • Malaysia cozah nih Chin ralzaam pawl hi phungning tein rianttuannak nawl pe hna – UNHCR
  • Kan ram ah kir awk kan ttha lo, UNHCR nih hnu kan chit rih hlah – ACR

Kuala Lumpur: UNHCR Malaysia lutlai Richard Towle nih, “Malaysia cozah nih ralzaam pawl hi phungning tein rianttuannak nawl pe hna, an nunnak tam tuk aa thleng lai,” a ti.

“Rian a ttuan liomi Malaysia um Chinmi hna hi cozah nih phungning tein rianttuannak card asiloah catlap na pek hna ahcun kan i lawm tuk lai,” tiah Richard nih nizaan ah a chim.

Nizaan kha Kuala Lumpur ah Chin ralzaam dirhmun video an piah hnu ah,

  1. Mung Khat – ACR Chairman,
  2. Richard Towle – UNHCR Malaysia lutlai,
  3. Saravana Kumar Maimuthu – Malaysia lahwahkah upadi bawi le
  4. Heidy Quah – Refuge for Refugees (NGO) dirhtu hna nih Chin ralzaam hmailei kong an ceih.

Chin ralzaam le adang minung covo aukanhtu pawl zong an ra ve.

Chin ralzaam hna cu 2019  kum dongh ah UNHCR nih hlawt ding, zohkhenh ti lo ding kan si.

Richard Towle nih, “atu ahcun ram thumnak ah kalter hi a har tuk cang. Ralzaam pawl caah a fekmi aphi kawl ding tu hi biatak tein kan i zuam. A poinak cu, vawlei thil sining aa thleng cang,” a ti.

“Kum dang bantuk a si ti lo. Kum dang ahcun US cozah nih kum fatin ralzaam 80,000 in 100,000 karlak peng a lak hna. Tu kum cu 30,000 lawng a lak cang.”

US nih ralzaam 30,000 lawng 2019 chungah a lak lai – ka hmet law relchap

“Ram thumnak kalnak kutka aa khar dih deng cang,” a ti.

Hmai kum dongh ah UNHCR nih Chin ralzaam a kan hlawt dih ahcun kan caah 2 lawng a taang;

  1. Malaysia ram ah zeihmanh lo le phungninglo in um le
  2. Myanmar ram ah kir lawng hi an si.

Richard Towle nih, “2019 kum dongh hnu cun Chinmi pawl cu UNHCR he kan i pehtlai hrimhrim ti lai lo, hlawt taktak an si ko lai,” tiah nizaan ah fiang tukin a chim.

“Chinmi pawl nih an chimmi hmunhma pawl cu UNHCR nih hlathlainak kan va tuah tikah Chin ralzaam pawl kirnak caah a him ko, nain Chinmi nih an duh lo bia khi a si,” a ti.

Mung Khat - ACR Chairman
Mung Khat – ACR Chairman

“Kan ram chungah ral a um rih, nihin tiang hi a um rih,” tiah ACR Chairman Mung Khat nih a chim.

“Myanmar cozah nih, a kirmi Chin ralzaam pawl hi ngaihthiam an si timi aamahkhannak ca a kan pek ahcun kan kir ko lai. Nain atu cu, a him rih hin lo,” a ti.

Malaysia lahwahkah upadi bawi Saravana nih, “ralzaam pawl cu Malaysia nih hramhram in kan khirh hrimhrim hna lai lo,” tiah nizaan ah fianghlang tein a chim ve.

Saravana Kumar Maimuthu - Malaysia lahwahkah bawi
Saravana Kumar Maimuthu – Malaysia lahwahkah upadi bawi

“Ralzaam pawl ram thumnak kalternak le an ram ah kirternak kong ahcun UNHCR le IOM he kan i bawm,” a ti.

“Atu lio cozah tlaitu Dr. Mahathir party PH zong nih thimnak lai i milemnak an rak tuah lio ah, ‘ralzaam pawl hi phungning tein riantuannak nawl kan pek hna lai’ an rak ti.”

“Cozah thar nih ralzaam caah a tuahmi hmuh lai cu nanmah bantuk tein kaa ngaih ve.”

“Nain Dr. Mahathir nih, ralzaam pawl caah upadi le phungphai thlen a hauh caah caan tam deuh kan herh a ti,” tiah a chimchap.

Malaysia cozah nih Chin ralzaam pawl hi phungning tein um le rianttuannak nawl a kan pe tak lai na zum maw? Comment..

Richard Towle zong nih, “Malaysia cozah nih ralzaam pawl bawmh dingin bia aa rak tiammi cu ka hnabei a sei ko,” a ti ve.

Richard Towle
Richard Towle – UNHCR Malaysia lutlai

“Ralzaam le ralzaam-soktu pawl Malaysia ram ah phungning tein an um khawhnak hnga cozah he biaruahnak kan ngei peng.”

“Malaysia cozah nih, UNHCR minung cu kan ram ah phungning tein um le rianttuannak nawl ka pek te hna lai’ a ti.”

“Malaysia cozah nih phungning tein umnak a tuahpiak hna ahcun, ralzaam pawl nunnak tam tuk aa thleng lai, sianginn zong an kai kho lai,” a ti.

“Malaysia cozah nih ralzaam caah MyRC card a tuah nain, mah card cu upadi zulhternak ca lawngah an hman, rianttuannak nawl a pe hna lo,” tiah Richard nih a chim.

“Ralzaam pawl phungnin tein rianttuan ter dingin Malaysia cozah le UNHCR nih minsen nan thut khawh hlan chung paoh cu Chinmi hna hi ralzaam card chuh awk kan ttha lo,” tiah Mung Khat nih a chim.

“Chin ralzaam pawl caah a fekmi aphi hmuh hlan paoh cu UNHCR card hi kan himnak caah a herh,” a ti.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.