Tuni 28 December 2018 ah Chin ralzam kong he pehtlai in Delhi hrambunh Australia embassy he tonnak tlamtling tein kan ngei, Delhi CRC president he kan kal i an kan don ning zong a lumsa ngai, High Commission lei in Secretary he tonnak ngeih a si i biachimnak caan zong saupi an kan pek caah kan dirhmun cu tampi in kan chim. 

Tuni kan i tonnak ah a biapi ngai ve mi cu “Chin miphun hi kir awk ah an him taktak maw “ timi hi a si ve. UNHCR lei nih bia tampi an rak chimh cang hna.

Tuni kan ton mi nih a kan chimh ve mi cu “ UNHCR lei in thil kan theih pah ve lengmang ko, Chin refugee zohkhenhnak kan dihdongh ter cang lai an timi zong kan theih, cun Malaysia lei cu option one an i thim dih ko i tlun ding ah a him ko ti hoih deuh in UNHCR nih an kan chimh ti bantuk pawl. 

Cu caah kan mah lei in fianhnak biatak tein kan tuah ve hna, Malaysia Chin ralzam tampi cu option one an i thimnak a raung, Delhi Chin ralzam nih an i thim mi le an i thimnak a ruang ti bantuk (Kan si khawh chung in). 

Cu Chin ram a him rih lonak kong biatak tein kan chim i CHRO nih report a hnu bik a chuah mi, Chin ram a him lonak kong a langhter tu zong kan pek hna, cun Chin refugee community lei nih UNHCR biachahnak kong ah statement chuah mi, CHRO, SAHDC, SAFHR fonh in press statement kan chuah mi etc pawl zong kan pek hna. 

Tutan kan ton mi hna hi a ttha ngai, kan dirhmun, kan ram dirhmun tampi kan chim pin ah UNHCR lei nih bia an rak chimh cang mi hna chung in a tampi lehnak le fianhnak zong kan tuah khawh ve. 

Kan chim mi a tampi, nain ka rak langhter lem lo i an biachim zong ka langhter lem lo. 

Note: Website in ca kan tar tikah UNHCR logos langhter lengmang hi a him lo.

Cattialtu: Salai Cung Dawt

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.