• UNHCR Malaysia nih Chin refugee kong biakhiahnak a tuah kho lo
  • UNHCR lubik a umnak Geneva khuapi ah phakter a hau
  • 21st Panglong Conference dih hlan paoh Chin refugee kan zohkhenh uh
  • Mah catlap chungah aa ttialmi pawl hi 21st Panglong Conference ah kan ceih lai, rak rel ve
  • Lahwahkah interview a awng cangmi cu thachiat tuk awk si lo
  • US cozah kan ton rih lai
  • Ram thumnak um Chin community le khrihfabu kip nih kan umnak cozah sin ah Malaysia le India taang Chin refugee kong chim cio usih

Pu Zo Tum Hmung le Pu Lian Uk nih August 20 ah UNHCR Malaysia lutlai Richard Towle an ton, ‘Chin refugee kong hi Geneva um UNHCR headquarters’ ah phakpi a hau an ti.

“Richard Towle nih, Chin refugee hlawt dingin biachahnak a tuahtu hi keimah ka si lo, Geneva um UNHCR headquarters nih a tuahmi si. Keimah cu UNHCR Malaysia hruaitu lawng ka si caah ka tuah khawhmi um lo a ti,” tiah an chim.

“2019 Dec 31 ah Chin refugee hlawt dingin cathluan kan chuahmi kha a donghnak a si lo. Thlen khawhmi thil a si, i bawm in a phi kan kawl tti hna lai,” tiah Richard nih a tiam hna.

“Ram Pumpi Kahngol Hnatlaknak (NCA) copy zong ka pek, kanmah Ethnic Nationalities Affairs Center nih Ramchung Umnak Ngei Lo le Ralzaam (IDPs & Refugees) kongah hitin si seh tiin policy recommendations kan chuahmi copy zong ka pek, Ramkhel Biaruahnak Tungtlang (Framework of Political Dialogue) le IDPs le Refugees kong ceihte ding copy zong ka pek,” tiah Pu Zo Tum Hmung nih a chim.

“CNF nih NCA minsen a thutmi kong zong ka chimh. Ramkhel biaruahnak caah a thutmi si, remdaihnak minsen a thutmi si lo ka ti.”

“Richard nih NCA kong cu a theih nain, Kum Zabu 21nk Panglong Khuakhannak ah IDPs le refugees kong an ceih timi a hngal rua lo ka ti. Kan chimh tikah a lung lut ngai.”

“Kum Zabu 21nk Panglong Khuakhannak aa lim hlan paoh cu Chin refugee hi voi dang bantukin ra kan daw ko uh, ram thumnak kalnak zong kan tuahpiak ko uh ka ti.”

“Nain, Richard nih UNHCR Malaysia lutlai a sinak in Chin refugee kong hi biachahnak a tuah kho lo. Geneva um UN headquarters ah phakter a hau,” tiah Pu Zo Tum Hmung nih a chim.

Pu Lian Uk nih, “US le ramdang lahwahkah interview a awng cangmi pawl cu kum 2019 a dongh hlan ah an kal manh lo zongah caan kan sauhpiak te ko men hna lai tiah Richard nih a ti,” tiah a chim.

Pu Zo Tum Hmung nih, “atu zong US ka kir cangka in US cozah ka ton lai i Richard Towle kan tonnak kong le Chin refugee kong ka va chim tthan lai,” a ti.

“Geneva UNHCR headquarters nih Chin refugee hlawt ding a timi a leet zokzok nak dingah a biapi bikmi cu ram thumnak um Chin upa kip nih kan umnak cozah sin cio ah awkhat chuah in biatak tein chimrel khawh a herh, cun Geneva UNHCR headquarters hrimhrim ah kan chimrel a herh,” tiah kan pale 2 nih an chim.

Video ah tling tein ngaih khawh si

CNF adviser Pu Zo Tum Hmung cu August 18 zaan ah Malaysia a phan. August 19 ah Chin Ralzaam Bu 5 komh (ICC) le Chin khrihfabu/pengtlang upa pawl he tonnak a ngei.

August 20 zaanlei ah Pu Lian Uk he Richard Towle an ton i, zaan ah US a kir tthan cang.

Pu Lian Uk cu Malaysia ah a caam lio a si.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.

1 COMMENT

  1. Hi kong he pehtlai in ramthumnak um kan Chin miphun hna le hruaitu upa hna nih nan umnak cozah cio ah le Ganeva ah Ka pa le pahnih Pu Zo Tum Hmung, Pu Lian Uk nih ra kan kal piak rih hna sehlaw ram hnihnak um Chin ralzam hna caah that lei kan panh ko lai. Hi hna pa hnih dah ti lo ahcun Chin mi chung in rinh chan awk an har ngaingai.

Zeitin na ruah?

Zaangfah na comment ṭial!
Zaangfah tein ka hin a min ṭial