Chin state ah AA le Kawl Ralkap an i kap, khuami an zaam

Zahan ah Myanmar ralkap le Rakhine Ralkap (AA) Chin ram, Paletwa pengah an i kap, tiah Voice of America nih a ttial.

Myanmar Ralkap nih vanlei zongin a kah hna, tiah khuami nih an chim. Mah ruangah khuami nih an inn an zaamtak len.

Paletwa peng chungah AA ralkap an um tiah an ruahnak hmun pawl cu zahan zingka ah Myanmar ralkap nih vanlawng in a kah thluahmah hna, tiah ဒလက္ေမ (Daletmay?) khuami pakhat nih a chim.

“11:30am ah cozah ralkap vanlawng 2 nih Daletmay khua ni-chuahlei ၀ကၠဴ၀ (Watkuwah?) khua kar ah bomb 3 an thlak.”

“Khuami pawl cu an thinphang tuk i Paletwa khuapi ah Honda tilawng hme tete in zaam an i tim,” a ti.

Paletwa peng ralzaam bawmtu Ko Kyaw Aung nih, “an i kahnak hi Paletwa khuapi he aa hlat tuk caah thawngpang fiang ka thei kho rih lo,” tiah a chim ve.

“Vanlawng tu cu kan hmuh ve. Paletwa khuapi cungin a zuangmi vanlawng 2 kan hmuh hna. Hriamnam ngan thawngpang thang pipi kan theih tiah chaklei khuate ah a ummi pawl sin in thawng ka theih. Nain, zei dah a cang ti cu ka hngal rih lo,” a ti.

January 19 zong ahkhan Myanmar ralkap le AA an i kah lio ah Paletwa peng Daletmay le အေဒါင္၀ (Adawngwah?) khuate kar ah hriamnam ngan pipi an rung phanh caah khuami cheukhat nih an inn an zaamtak len, tiah Daletmay khuami pakhat nih a chim. — Voice of America

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.