Chin state cozah nih Kum 71nk Chin Miphun Ni (CMN) cu 2019 February 20 ah Hakha ah sunglawi taktak in a tuah lai, tiah kan theih.

January 3 zaanlei 1pm ah Chin state cozah hall ah meeting an tuah i Vum Tu Maung celhtual ah CMN tuah dingin bia an khiah hi si.

Meeting lio ah Chin cozah lutlai Salai Lian Luai zong biachimnak a ngei.

Chin nunphung a simi khuang cawi, paih, pupa laam hna le zung dangdang hna nih thil hmusaknak (piah-khaan) pawl zong an tuah lai.

Chin cozah nih khuapi dang ah Chin Miphun Ni a tuah ve awk si

Tutan hi NLD cozah nih avoi 3nk Chin Miphun Ni a tuah si lai. Avoi 1nk 2017 cu Falam khuapi ah a tuah.

Avoi 2nk 2018 kha Hakha khualipi ah a tuah. Avoi 3nk tutan zong Hakha ah tuah a timh tthan.

2018 kha Paletwa ah tuah dingin khua an rak khan hrulh nain an let tthan. 2019 ahcun Paletwa ah a tuahte ttheo lai tiah zumh cio a si nain, zei ruang dah Hakha ah a tuah tthan ti hngalh a si rih lo.

Rampi cozah nih phungning tein Chin Miphun Ni tuahnak nawl a kan pek hnu in Chin state cozah nih Hakha, Falam le Mindat lawngah a tuah peng.

Tedim le Paletwa, tbk., Chin khuapi dang hna ah kum 1 hnu kum 1 in tuah ve lengmang sehlaw Chin miphun dawtnak le lungrualnak tampi a bawmh lai i miphun huap in rianttuan zong a fawi deuh ngai lai.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.