Yangon airport ah vanlawng an kai lio

Chin state ah a um hmasa bik a si ve ding, Falam khua pawng i Surbung Airport cu 2020 September ah kan hun lai, tiah Myanmar Vanlawng Zung lutlai changtu U Ye Htut Aung nih a chim.

MMK 30 billion in sakmi airport cu 2016-17 in sak hram an thok, 2021-22 ah lim dingin rak timh a si. Nain kan hnu thla ah, Aung San Suu Kyi le President U Win Myint nih “2020 ah lim dingin sa ulaw 2020 September thla ahcun hman khawh dingin tuah uh” an ti hna.

“2020 September thla hlan ah kan lim khawhnak ding ahcun tangka tam deuh a hau lai. Atu hi kum 1 MMK 5 billion in rian kan ttuan. Caan khiahmi chungah kan lim khawhnak ding ahcun MMK 10 billion a herh chap lai. Tangka cu vuanci zungah kan hal a hau,” tiah U Ye Htut Aung nih a chim.

Atutiang ah, vanlawng tliknak, dirnak, le hmunhma tuah an thok cang. Thilri, vanlawng control nak, vanlawng tliknak lam mei, tbk., an hau rih, tiah a chimchap.

1289 acre vawlei ah airport cu an sak i vanlawng tliknak lam hi 2,000m hrawng a sau lai tiah zumh a si.

Chin state ah peng 9 a um. Nain, lam a tthat lo ruangah lungduh in i tlawn khawh a si lo. Fur caan ahcun, leimin le tilian ruangah i tlawn khawh hrimhrim a si lo. State dang le ramdang kal a duhmi cu, lam nai bik airport a umnak Sagaing ramtthen, Kalaymyo an panh tawn.

“Mah ruangah, Chinmi hna caah a fawi deuhnak hnga Falam ah airport kan saknak si,” tiah U Ye Htut Aung nih a chim.

Surbung Airport an lim hnu cun, Rih Tidil le Nat Ma Taung National Park ah a tlawngmi zong an karh deuh ngai cang lai. Chinmi cu Khrihfa deuh lawngte an si caah Nitlaklei rammi (Mirang pawl) zong an rung tlawng len te lai tiah zumh a si.

Chin state cu lam, ti le mei an chiat tuk caah Myanmar ram chung state le ramtthen vialte lakah a sifak bik le a tthangcho lo bik a si.

“Airport an sak dih tik cun, Chin state cu Nay Pyi Taw le Yangon in suimilam tlawmpal chungah phanh khawh a si cang lai. Cucaah khualtlawng zong an karh rang deuh lai,” tiah Chin State Thanchonak, Lam, Khualtlawng, Electric le Sehzung Vuanci hlun Salai Isaac Khen nih a chim.

Chin state cozah nih Tedim, Tonzang, Falam le Hakha peng hna zongah airport a hme deuhmi sak dingin timhtuahnak a ngei.

Dr Sa Sa a hawile UK rammi bawmhnak in Lailenpi khua ah an sakmi vanlawng tliknak lam 1,000m a saumi airport pakhat zong tu kum March 6 ah an hun cang lai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.