Chinmi 30,000 leng khirh lo dingin UNHCR an nawl

Qatar ram ah hram bunhmi media Aljazeera nih “UNHCR nih buainak lakah Myanmar Chin miphun khirh a timhmi hna cu ngol chung dingin an nawl” tiah tuni ah a ttial.

“UNHCR nih minung nunnak le ralzaam covo a dirkamh taktak ahcun Chin ralzaam khirh dingin bia a khiahmi hi a zoh tthan hrimhrim a herh,” tiah ACR coordinator James Bawi Thang Bik nih a chim.

“2017 August thla ah Myanmar ralkap nih velh, tlaihhrem le thah ruangah Rohingya 700,000 leng Bangladesh ah an zaam. Atu ah Rakhine le Chin state ah Myanmar ralkap le AA an i kap hoi. Myanmar cozah nih a rammi a huhphenh kho rih hna lo ti a fiang. Ziah UNHCR nih aa namchan len?,” tiah Evan Jones, Bangkok um Asia Pacific Refugee Rights Network i programme coordinator nih a chim ve.

Kum 1980 hrawngah Chinmi caah rian a rak ttuanmi le Chin state zong a tlawng lengmangmi Edith Mirante nih, “Chin state thlanglei hi AA nih an ralkap tinttan peknak hmun ah an hman,” tiah a chim.

“Myanmar ralkap nih an hun tuk hna caah 2017 ahkhan Chinmi tampi ramleng ah an zaam. Chin state chungah ralkap tamtuk an um rih. Khua kip ngawt ah ralkap an um. Chinmi caah cun ttihnung ngai a si rih ko,” tiah a chim.

Chin khualipi Hakha um Chin Nuhrin Covo Bu (CHRO) zung in Salai Sang Hnin Lian nih, “Paletwa le thlanglei Laitlang ramri ah buainak a chuak lengmang. Chin khrihfa pawl cu an biaknak zalong tein hmang kho lo dingin cozah nih a tuah hna,” tiah a chim ve.

“UNHCR nih Chin state a dai in a him cang a timi hi a si hrimhrim lo,” a ti.

UNHCR – Thailand khualipi Bangkok um UNHCR zung aiawh biachimtu Caroline Gluck nih, “an phanmi hi kan theihthiam. Chin state thil sining cu dong loin kan hlat peng ko,” tiah a chim.

“Thil sining rang tukin aa thleng kho ti zong hi kan hngalh ko. Thil sining aa thlen ahcun aa thlen ningin UNHCR nih rian kan ttuan colh ko lai,” a ti.

University of East Anglia ah rian a ttuanmi Kirsten McConnachie nih, “UNHCR phunglam ah aa ttial ning ahcun, ralzaam nu/pa i a ram kha mithmuh kut tongh in aa thlen i aa thlengmi cu a hmun ding a si ahcun UNHCR nih ralzaam in hlawt khawh a si, ti a si,” tiah a chim.

“Hitin UNHCR nih phunglam a tuahnak a ruang cu, ralzaam hi UNHCR nih a ram ah a khirh colh ahcun harnak a tong sual lai ti an phan caah a si.”

“Nain, tutan Chin ralzaam cungah biachahnak an tuahmi cu aa phundang ngai. Chin state ah thlennak pipa le a hmun ding thlennak a um lo. Myanmar ram a him rih lo ti a langhter tu thil tampi an um rih,” tiah a chimchap.

UNHCR nih Chin ralzaam cazin a thah thluahmah

Malaysia UNHCR cazin zoh tikah a zor tuk ti hmuh khawh a si. UNHCR nih Chin ralzaam hlawtnak kong thawng a thanh hlan ahcun UNHCR cazin ah Chin ralzaam 31,150 an rak um.

Nain, kan hnu December thla ahkhan cun UNHCR cazin ah Chin ralzaam 26,180 lawng an taang cang.

“Ralzaam cazin kan khar tawnmi ruangah Chin ralzaam an zormi hi si,” tiah UNHCR nih Aljazeera sinah a chim. “Chin ralzaam hlawtmi zong an um. Card thlen ah a ra ti lomi zong an um. Chawnh khawh lomi zong an um,” a ti.

“2018 chungah Malaysia in ralzaam 2,400 ram thumnak ah kan kuatmi hna lakah Chinmi tampi an i tel ruang zongah a si,” a ti.

Chin ralzaam bu nih tuahmi Chin ngakchia cacawnnak inn ah cachim a simi Mang Pi nih, “nulepa hna nih UN card an ngeih ti lo caah palek nih a kan tlaih lai ti phangin an fale sianginn ah an ap ti hna lo i ni kum nakin siangngakchia an tlawm deuh,” tiah a chim.

“UNHCR nih Chin ralzaam a donghtermi hi a diklo ti cu hopaoh nih an hngalh dih ko. UNHCR nih mah hi a remh lo ahcun, duhlonak tam deuh kan langhter lai,” tiah ACR coordinator nih a ti.

Malaysia ram ah Chinmi 39,000 hrawng kan um, tiah Chin ralzaam bu upa pawl nih an chim. India ah Chin ralzaam 4,000 hrawng an um ve.

2019 dongh tiang lawng UNHCR nih card a pek cang hna. Chinmi 99.99% cu 2020 January 1 in cun UNHCR he pehtlaihnak an ngei ti lai lo i Myanmar ram ah kir asilaoh phungninglo in Malaysia ah um i palek nih hmuh paoh ah tlaih an tong cang lai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.