Chinmi Nan Caholh Aa Khah Lomi Nih Chin State Ṭhancho A Nuarhter

Myanmar um Sweden tanzung lutlai Mr. Johan Hllenborg cu November 5 in 10 tiang Chin state a tlawn hnu ah, “Chinmi nan caholh aa khah lomi nih tthanchonak rian ttuan a harter,” tiah November 11 ahkhan Kalaymyo ah media pawl a chimh hna.

Mr. Johan Hllenborg nih, “Chinmi nan caholh aa khah lomi nih lungrualnak le tthanchonak rian nan ttuan tikah harnak an pek hna ti hi ka hmuh khawhmi si, state dang le region dang hna zongah mah ruang hin lungrualnak le tthanchonak rianttuan an i harh cio,” a ti.

“Hmun dang he aa khah lonak cu, Chin state cu tlang an tam tuk caah cinthlaknak caah hmun rawn a tlawm. Mah ruang cun state le region dang nakin nan sifah deuhnak a si lai tiah ka zumh.”

“Sifah zorter dingin khuate pawl nih coffee le tangka hmuhnak a tthami thingthei hna nan cinmi ka hmuh tikah, tthat lei a panh cang tiah ka ruah,” a ti.

Sweden ram nih, Chin state ah ngandamnak, nu le pa tlukruannak le media tthanchonak hna a kan bawmh. Sweden ram nih Myanmar ram pumpi caah tangka $30 million a bawmh i, tu hnu kum 5 zong a bawmh rih lai, tiah kan theih.

Mr. Johan Hllenborg nih, “khuate lei kan kal tikah, hruainak lei ah nu pawl an i tel ngai ve cang ti kan hmuh, Chin state cozah nih lamsul le a herhmi dang tete zong a sak lenmi hna kan hmuh, nain tuah a herhmi tamtuk a taang rih. Kanmah Sweden ram zong nih kan si khawh tawk bawmh rih dingin timhtuahnak kan ngei,” a ti.

Sweden cozah palai Mr. Johan Hllenborg le a zultu hna cu tutan ahhin Tedim khuapi, Rihkhuadar khuapi, Falam khuapi le Hakha khuapi hna an phan.

Sweden cozah nih a bawmhmi bu pawl an ton hna. Chin state cozah lutlai Pu Lian Luai le Hlutdaw hruaitu Pu Zo Bawi zong an ton hna. — Chin World

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.