Chinpa 2 sinin Mizoram cozah nih Rs 24.5 million man sui a tlaih

Myanmar ram in India ram ah an phorh i Guwahati khuapi ah zuar an timhmi India tangka ting 245 leng (Kawlram tangka ting thong 5 leng) man sui tlang 45 cu Mizoram state cozah nih October 18 ah a tlaih hna.

Sui tlang a phortu Chinpa 2 zong a tlaih chih hna.

Mizoram state khualipi Aizawl in Assam state lei ah a kalmi motor maxicab pakhat cu Aizawl um Chawva Kherhlainak Zung (DRI) le Assam Rifle battalion 46 nih Mizoram, Sihphir khuapi ah an check.

Cutin an check lio ah Chinpa 2 le an phorhmi sui tlang an tlaih hi si.

Rupee ting 245 leng man sui tlang 45 le a ngeitu an si lai tiah zumhmi Chinpa Thang Thawn Mung, kum 19 le Do Sian Lang, kum 18 cu 1962 Thilri Upadi in case an tuahpiak hna.

2018 atutiang ahhin Myanmar, Bhutan, Nepal le China ram pawl in India nichuah-chaklei state pawl ah an rung luhpi mi sui 298.173kg leng kan tlaih cang, India tangka Rupee in ting 9,084 man leng a si, tiah Chawva Kherhlainak Zung (DRI) nih a chim.

Phungninglo in India ram chungah thil a rak luhpi tu nan theih hna ahcun DRI sinah thawng kan thanh peng uh, thawngthanhtu nan min cu kan phuang lai lo nain thawng na kan thanh man laksawng kan in pek hna lai, tiah DRI nih a chim.

Liamcia July 31 zongah Myanmar ram in Mizoram state ah an rung phorhmi Rupee ting 927 man sui tlang 217 le a phortu Myanmar rammi 5 hna cu Mizoram state Assam Rifle ralkap le Mizoram palek nih an rak tlaih hoi cang hna.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.