Chinpa 'Pu Nathan Bawm' Bangladesh ram ah MP aa cuh ve lai

Bangladesh – Chin (Bawm) miphun a simi Pu Nathan Bawm nih MP i cuh ve dingin November 18 ahkhan Bandarban Thimnak Bu Zung ah min apnak form a cawk cang.

Kum 1971 ah Bangladesh nih Mirang uknak in luatnak a hmuh thokin, atutiang ahhin Bangladesh um Bawm (Chin) miphun chungin MP aa cuhmi hohmanh an um bal rih lo. Nathan Bawm hi avoi khatnak bik Chin pasal ttha, tuanbia ṭialtu a si.

Ruma peng, Theihkhiang khuate ah a rak chuakmi Nathan Bawm cu December 30 ah tuah ding avoi 13nk Bangladesh ram pumpi cozah thimnak ah Chittagong ramṭhen, Bandarban district hlutdaw MP aa cuh ve lai.

Nathan Bawm nih min apnak form a lak lio
Nathan Bawm nih min apnak form a lak lio

Bandarban district hlutdaw ṭhutden (MP) thimnak ah vote a thla khomi minung 246,183 an um.

Bawm cu Bangladesh ram i miphun 11 lakah aa tel vemi a si. Bangladesh ram ahhin Bawm minung 11,637 an um i Ruma, Thanchi, Twoangchhari le Bandarban Sadar peng i khuate 70 ah an um hna. Khrihfa deuh lawngte an si hna i Kuki, Hmar, Lai, Zo, tbk. in an holh aa dang cio.

India ram zongah Bawm minung 5,000 hrawng an um i Myanmar ram ah 1,500 hrawng an um.

Nathan Bawm cu Fine Arts Department of Dhaka University in Master degree a ngahmi si kaw, zuk suai a thiam taktak. London um, Oxford University library zongah amah zuk suaimi le a cauk chuahmi an um len.

Zuk suai a thiam taktak

Kuki-Chin Miphun Ṭhanchonak Bu (KNDO) a dirhtu le President zong a si. Bangladesh ram, Chittagong tlangthluan ah a ummi Kuki-Chin-Zo miphun hna hi cozah nih a daihthlanh tuk hna caah i lungrualnak le ṭhanchonak caah KNDO a dirh hi si.

Nathan Bawm cu Kuki-Chin-Zo miphun kong kum tampi a hlat hnu ah “The Bawmzos” ti tlangtlar in cauk a rak chuah. Adang cauk 6 zong a chuah caah Bandarban pengah a minthang ngaingai.

Bangladesh media nih Nathan Bawm kong an ttialmi
Bangladesh media nih Nathan Bawm kong an ttialmi

“Pumpak (independent) in kaa cuh lai i Bandarban pengah miphun lungrualnak ka tuah lai. Chittagong Hill Tracts ah a ummi miphun vialte tlukruannak caah rian ka ttuan lai. Bangalis le Chittagong Hill Tracts um miphun vialte karlak ah daihnak ka ser lai i miphun thleidannak ka donghter lai,” tiah Nathan Bawm nih a chim.

“Tutan thimnak caah hin liamcia kum 5 chung kha timhtuahnak ka rak ngei cang. Santlai lomi miphun zong ka bawmh hna,” tiah a chimchap.

Thimnak ah i cuh ve dingin min apnak form cu a cawk cang i November 28 ah a ap te lai.

Bangladesh ram ahcun thimnak luh a duhmi paoh nih min apnak form cawk a si i a tlai bik November 28 ah ap dih ding a si.

Nathan Bawm nih cauk a chuahmi
Nathan Bawm nih cauk a chuahmi
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.