Chinpa Thang Sang Cu Vanlawng Chung Ah Palik Nih Hramhram In An Tlaih

Chinpa Thang Sang (kum 28) cu September 26, 2018 ahkhan Honolulu in San Francisco ah zuan a timmi Alaska Airline vanlawng chung ah palik nih hramhram in an tlaih.

Thang Sang cu vanlawng aa thawh hlan deuh ah zunput ah a lut i innka aa hrenhkhumh. Caan sau lak te a chuah ti lo caah vanlawng rianttuantu nih palik an auh hna.

Palik an ra i Thang Sang cu angki hruk lo in zunput in an chuah. A pum zong cin dih. Palik nih vanlawng in ttum an ti i, ka ttum lai lo a ti hna. Cucaah, palik nih hramhram in an tlaih i minutes 20 hrawng an rau.

Vanlawng chung um khualtlawng le vanlawng rianttuan zong thinphang in an um. A donghnak ahcun Thang Sang cu vanlawng chung in an chuah khawh.

Palik nih Thang Sang an tlaih lio cu Lindsey Babb nih phone in video a thlak.

Video chung ahcun Thang Sang cu palik tlaih a duh lo i a thek len, a au len. “Zei ruang ahdah fahnak nan ka pek?” tiah Thang Sang cu a au len, nain palik nih “Kan chimmi na zul duh lo cuta” tiah an chimmi zong theih khawh a si.

Atu hi Thang Sang cu ningcang loin a um, tlaih a duh lo pinah palik fahnak a pek tiin tazacuai a tong.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.