Rakhine state – Avoi 1nk bik Christmas puai tuah aa timmi Chin khrihfa pawl cu Nikhatni ahkhan phungki hruaimi Buddhist pawl nih an tthuat hna.

“Chin khrihfa 2 hliam an tong, Christmas kan ttamhmi zong a kan hrawhpiak dih,” tiah Ann peng khrihfa tlangbawi Rev. Thing Be nih a chim.

Sappie khua um Chin khrihfa 12 hrawng cu khua leng ah Christmas tuahnak mandat an sa i an ttamh lio chun lailing ah phungki 3 nih khuami Buddhists 40 hrawng i ruaih in an rung chuah hnawh hna.

Phungki le Buddhist pawl nih cun “ngol uh!” an ti pah hna in an velh thluahmah hna.

“Ahlankan in khua cozah sinah Christmas tuahnak nawl ka hal ko nain, Christmas tuahnak mandat cu sa chung ko usih tiin khua lengah kan saknak si,” tiah Rev. Thing Be nih a chim.

“Vicar Aung Lan cu alu fak tukin a kuai caah Ann pengkulh sizung ah kan piah lio a si. U Soe Thein zong hliam a tong ve. Palek sinah report an i timh lio si.”

“Buddhists misual pawl cu Sappie khua phungki inn lutlai pa le phungki dang 2 nih an hung hruaimi hna an si. Biaceihzung kan phak ahcun tehte video zong ka ngei ko,” tiah a chimchap.

Khuabawi U Soe Thu nih, “Khrihfa le Buddhist an i vel tak ko, nain a caan lio ah khua palek nih an tthen colh hna i fak piin aa hliammi an um lo,” tiah a chim.

“Keimah le pengkulh cozah sinah ahlankan in Christmas tuahnak nawl hal hmasa uh tiin Christmas tuahtu upa pawl ruahnak ka cheuhmi hna an ngai lo.”

“Bia alnak a chuahnak hnu ah nawl an hung ka hal i ka pek hna, nain a tlai tuk cang.”

“Kan Oo, Sappie le Mae La Maung khua 3 i phungki hruaitu pawl nih hmun dangah Christmas cu va tuah uh, kaa hi cu Buddhist umnak a si i Christmas an tuah bal lonak a si tiin nawl an pek hna.”

“Phungki pawl zong nih cutin nawl peknak nawl an ngei lo,” tiah U Soe Thu nih a chimchap.

Sappie khua khrihfa a si vemi U San Gyi nih, “a kan tthuat lio ahhin ka um ve. Buddhists misual pawl cu phungki 3 nih an hung hruai hna. Buai loin a tthatnak in kan i ruah hna lai tiah kan nawl len hna nain an duh lo,” tiah a chim.

“Kaa khua in Christmas an tuah bal lo. Buddhist vawlei ah Khrihfa puai tuah kan onh lo, a kan ti. Biaknak zalonnak kan ngah lomi le kan biaknak khenkham kan tonmi cu kan ngaihchia tuk hringhran. Midang bantukin nuam tein Christmas tuah kan duh tuk ve.”

“Buddhists pawl nih a kan thuat lio ah phungki pawl nih a kam in an zoh hna. Vel hna hlah uh, bia in kan i ruah hna lai an ti hna awk si nain an zoh sawhsawh ko hna.”

“Sappie khua ahhin khrihfa chungkhar pahnih-thum hrawng lawng kan um caah biakinn zong kan ngei lo. Kanmah inn tete ah thla kan cam tawn hna. Chin state in khrihfa tlangbawi pawl nih a kan tlawn tawn.”

“Biakinn saknak hmun zong kan i cawk kho lo. Hmun va ngei hmanh usih law biakinn saknak nawl fawi tein a kan pe lai lo,” tiah U San Gyi nih a chimchap.

Kan hnu zarh zongah, Magwe ramtthen, Gangaw pengah Christmas rawl a chuangmi Chin khrihfa pawl cu phungki hruaimi Buddhists pawl nih lungin an cheh hna i Christmas rawl an chuanmi zong an thletpiak dih hna. Chinmi 2 zong hliam an tong hoi cang.

Kum zeizat remruam dah Myanmar buddhists nih khrihfa a kan hrem peng rih lai?

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.