CYO Malaysia Cup ah Team 10 an i phomh lai
CND Malaysia Cup, 2018 lio

CYO Malaysia Cup cu Puchong le Kuala Lumpur ah an tuah lai.

October 5 in 6 tiang Puchong i DHL Celtual ah an tuah lai. Quarter, Semi le Final cu October 13 ahkhin Kuala Lumpur ah an tuah lai. Kuala Lumpur ah tuahnak ding celtual cu hnu ah kan thanh tthan te lai.

“Hmasa cun team 10 aa phomh ding an si nain atu hi team 3 an lut chap i a nuam lawlaw khi si ko lai. CND Cup ah a rak chuih kho lomi a thiamthiam pawl zong tutan ah a chuih ding an si. Kawlram in a rami minung 1 zong Chinstar FC in a chuih lai. Malaysia Chin bawlung puai ahcun zoh nuam bik a si ko lai, a caan aa naih deuhdeuh, thintur a rang deuhdeuh,” tiah CYOM nih a chim.

Pakhatnak laksawng cu RM2,000 le trophy a si lai.

Pahnihnak laksawng RM1,000 a si lai. Hmasa ahcun RM800 an ti nain RM1,000 ah an kai.

Pathumnak laksawng a um lai lo nain atanglei langhtermi laksawng pawl hi an um lai;

  • Hmaikal thiambik
  • Alaikal thiambik
  • Hnukham thiambik
  • Goal bawh thiambik
  • Voi tambik a goal tu
  • A chuihmi vialte lakah a thiambik
  • Kum 20 tang mino lakah a thiambik

Ningchim (coach) thiambik laksawng zong a um lai.

Cun, final ah champion aa cuhmi team 2 zaanglek pawl cu an dihlak in medal pek dih an si lai.

A chuih ding team 13 hna cu;

  1. Matu FC
  2. Aidak FC
  3. Legend FC
  4. Chinstar FC
  5. Kepong FC
  6. Falam FC
  7. Chinland FC
  8. Dingdi FC
  9. Vazun FC
  10. Bravo FC
  11. Deirel FC
  12. Calvary FC le
  13. Vaurawng FC hna an si.

A ni khatnak ah aa phomh ding hna cu;

  1. Matu vs Aidak
  2. Kepong vs Falam
  3. Dingdi vs Vazun
  4. Deirel vs Calvary
  5. Legend vs Chinstar

“A hmun (DHL Celtual) ah CYO Malaysia EC chungtel leeng le vaal, le Malaysia Chin ngaknu le tlangval dawhdawh pawl nih ti le rawl man fawi tein an zuar lai. Zeihmanh i ken hau lai lo,” tiah CYO Malaysia nih a chim.

“Atu lio Malaysia Chinmi boruak zoh tikah hmai kum lei cun Chinmi kan tlawm tuk cang ding a lo, tutan hi Malaysia um Chinmi huap bawlung puai a donghnak a si lo hmanh ah a donghnak changtu a si kho men.”

“Cucaah, Malaysia a ummi paoh (mino in upa tiang) nih rak zoh cio hna usih tiah kan in sawm hna, sang le khua dang um hawikom le chungkhat he i tonnak caanttha zong a si,” tiah a chimchap.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.