Tuni 21 December 2018 ah UNHCR he tonnak ngeih tthan a si. Tuni meeting i an chim mi chung in Chin ralzam hna nih theih a herh ngai mi thil a um. 

1. Notification Interview kong ah thil thar

UNHCR nih notification interview cu an thok cang i nihin tiang an pehzulh (ni 9nak? a si cang). Tuan lio an kan chimh ning ahcun Notification interview ah option one a si lo ah two na thim mi kha zeitik hmanh ah na let tthan kho ti lai lo ti a rak si.

A si nain tuni ah an chim tthan mi cu “Notification interview ah option na thim cang mi kha thlakhat chungah na let tthan khawh, na thiam cia mi option kha ttha tein na ruah dih hnu ah let tthan ka duh ko na ti ahcun thlakhat (30 days) chung ah letnak nawl na ngei ti khi a si.

Hi ka zawn ah theih fian a herh mi cu Notification interview a tuah cang mi vialte kha a hmaithlak ah interview date an i pek tthan hna i cu ahcun two na thim cang mi kha one ah na thlen tthan khawh tinak khi a si.

(Theih a herh mi: Nihin tiang interview a tuah cang mi nih option two an i thim ( a tam deuh nih) ti a si. Cu caah thlakhat chungah na thim cia mi option kha na duh le na rak thlen tthan khawh ti nak a si ko).

2. Kawlram ah a kir mi dollar 200 bomh ding timi kong ah thil thar

A hnu bik kan ton tiang ah an chim mi cu option one aa thim i Kawlram ah ka kir ko lai tiah biachahnak a tuah mi cu minung pakhat ah dollar 200 pek nan si lai tiah an rak chim.

A si nain tuni ah an chim tthan mi cu dollar 200 cu Repatriation package ca lawng ah kan chim mi a si, cu caah kawlram an phak tikah dollar 200 pek an si lai. Tlunnak ding (Travel package) cu a dang tein pek nan si lai i India nan um chung, nan i thawh hlan ah pek a si lai.

A mah belte nan khual lam tuak in phaisa zeizat dah nan herh lai timi in kan tuak te lai ti a si. (Hi ka ah theih ding, Delhi um mi cu kir hmanh ah tanglei in si dawh a si. Delhi in Tlanglawng, Guwathi in motor, cun Laitlang khua tiang motor a si lai caah nizeizat dah nan rauh lai timi in kan tuak te lai tiah an chim)

3. Go and See visit kong ah thil thar

Go and See visit hi a luancia September thla lio ah tuah ding in rak timh a rak si, cu lio ah an kan chimh mi cu Laitlang dirhmun, Chin ram dirhmun tha tein kan hlathlai hmasa ve lai i cu hnu ah a herh ning in thawng kan i thanh te hna lai an rak ti ruang ah September thla in thok ding mi notification interview zong postpones an rak kan tuah piak.

A si nain tuni ah an chim tthan mi cu “Go and See visit cu a ra laimi January-2019 a si lo ah February thla chungah tuah ding in timhtuah dih a si cang.

A si nain tutan Go and See visit hi Chin ram a him maw timi kong zohfelnak ngai ngai a si lai lo, UNHCR nih Chin ram dirhmun cu a zoh dih hnu ah biachahnak cu a tuah ko cang, cu caah tutan Go and See visit cu option one aa thim i tlunnak a sok mi caah a tthahnem ding information khomh nak lawng a si lai tiah an chim.

Cun Chin refugee hi khuazei dah an tam bik, khuazei pengtlang (Township) dah an tam bik timi kan zoh lai i nan tam bik nak khawh le hmunram ah kan kal lai ti a si.

Note: A dangdang Australia auhnak kong pawl ah ceih mi le an chim mi a um len rih nain biafiang ngai ngai in tar awk a tthat tuk rih lo caah kan langhter lo. Cun a cunglei kong he pehtlai in a fiang lomi nih keimah pumpak ah siseh, community upa sin ah hal khawh a si lai.

Cattialtu: Salai Cung Dawt

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.