Dohdalnak Um Bu In Thantlang Ah Ralbawi Aung San Milem Phun Rian An Thok

“Thantlang khua ah kyat ting 70 dih in ser dingmi ralbawi Aung San milem le pangpar dum tuah ding rian kan thok cang,” tiah sipin committee chungtel Pu Obed Nawl Ceu nih a chim.

“Acre 5 hrawng a kaumi pangpang dum chungah ralbawi Aung San milem cu kyat ting 70 dih in kan phun lai. Aung San milem saknak caah cozah nih kyat ting 300 a kan pek.”

“Cu chungah, kyat ting 230 in pangpar dum kan tuah lai. A tangmi kyat ting 70 cu Aung San milem caah hman a si lai,” tiah Pu Obed Nawl Ceu nih a chim.

Thantlang khua i ralbawi Aung San milem phun nak caah a dih dingmi tangka cu khua tthanchonak tu ah hman ding a si tiin Thantlang zatlang bu hna nih duhlonak ca zong sipin vuanci sin ah an rak kuat bal.

“Thantlang i hluttaw kuzale pawl le khuanu, khuapa pawl he meeting kan tuah cang. Martyr ni kan tuah ahcun pangpar dum chungah ralbawi Aung San milem cu a um awk si ko tiin khuanu, khuapa cu kan chimh hna i an lungtling ko. Mitlawmte a tlungtling lomi an um ve,” tiah Pu Obed Nawl Ceu nih a chimchap.

“Ralbawi Aung San milem hi Thantlang caah a herhnak um lo tiah ka ruah. Hi nakin a biapi deuhmi tuah dingmi tampi a um. Lam ser thokin a dang tuah a herhmi tampi a um. Aung San milem sernak caah a dih dingmi tangka nih a dang a tuah khawh dingmi thil tampi a um.”

“Mipi nih kan dohdal buin an thokmi hi cu cozah an si ruang a tuahnak nawl an ngei i, kan doh buin an thokmi si ko tiin ka ruah,” tiah Thantlang zatlang bu ah aa tel vemi Mai Parku nih a chim. _ Chin World

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.