Thaizing, November 3 Thimnak ahhin Chin party pawl nih MP an ngah ahcun Rampi Remdaih Khuakhannak (21st Century Panglong Conference) ah an i tel khawh ve lai caah Chinmi caah a ttha lai, tiah CNF Vice Chairman Dr. Lian Hmung Sakhong nih a chim.

Dr. Sakhong nih, “remdaih khuakhannak ahhin; Tlangcung Hriamtlai Bu, Cozah le Ramkhel Bu tiah a tlangpi in bu 3 nih ramkhel kong kan ceih. Chin min a kengmi party pakhat hmanh an i tel lo. Zomi Congress for Democracy (ZCD) cu a um. Chin min a kengmi party pakhat tal an rung i tel khawh ahcun kanmah ca zongah a ttha tuk lai,” tiah a chim.

Chin party pawl cu kum 2015 Thimnak ah MP an ngah lo ruangah Rampi Remdaih Khuakhannak ah an i tel kho lo. Mah ruangah harnak kan tonmi cu a umlo nain, an i tel khawh ahcun a ttha deuh ko, a ti.

“Chin party nih MP an ngah ahcun Rampi Remdaih Khuakhannak Tawlreltu Bu (UPDJC) ah an i tel khawh ve lai caah CNF he zong khuakhan ttinak kan ngei kho lai. Rampi Remdaih Khuakhannak ahhin atutiang Chin a aiawhtu party pakhat hmanh an um lo,” tiah a chim.

Dr. Sui Khar: Chin party nih MP an ngah herh

Dr. Sui Khar
Dr. Sui Khar

CNF Secretary Bawmtu Dr. Sui Khar zong nih, “Rampi Remdaih Khuakhannak ahhin ramkhel bu pawl nih ceih a haumi tete an um ve len caah Chin party pawl nih MP an ngah i an i tel khawh ve ding hi a biapi tuk,”  tiah a chim.

“Tlangcung/Chin Hriamtlai Bu  (EAO) in CNF kan i telmi lawng hi a za lo. EAO nih kan aiawh ding konglam tete a um bantukin ramkhel bu nih an aiawh ding tete a um ve. Cozah le ralkap nih aiawh ding kong tete an um ve.”

“NLD cozah nih ‘MP a ngahmi party lawng Rampi Remdaih Khuakhannak ah i tel khawh si’ tiin phungphai a tuah ruangah Chin party pawl an i tel kho ti lo. Mah phungphai a tuahmi hi tlangcung ramkhel bu pawl i tel kho hna hlah seh tiah a tuah hramhram mi phun khi a si. Chin party pawl an i tel khawh lomi hi ngaihchia ngai a si,” a ti. — Chin World

Ram Tinthei: Caan Karlak Thimnak Le Chin Party – ka hmet law relchap

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.