Facebook company nih, “Myanmar Facebook account, page le group 216 kan khar piak hna, cheukhat cu Myanmar ralkap he pehtlaihnak a ngeimi an si. Mipi ruahnak thlen aa timmi an si caah kan kharpiak hna hi a si,” tiah Nilini ah a thanh.

Kan khar piakmi 216 cu followers thong tampi a ngeimi Facebook account 89, page 107, group 15 le Instagram account 5 an si.

Facebook nih hin a luancia caan zongah Rohingya kong he pehtlai in Myanmar ralkap bawi Min Aung Hlaing account le account dang tampi a rak khar bal cang.

Atu tan i Facebook nih a delete piakmi account, page le group pawl nih hin mipi ruahnak thlen duh ah thawngpang taktak pawl kha anmah duh ning in an kuih i an tar.

Buainak, Tlangcung miphun kong, minthang kong le ralkap kong, tbk., thawngpang pawl kha anmah duh ning poah in an thlen i an tar peng.

“Mah account, page le group a ngeitu pawl nih an min le konglam thuh an i zuam len nain hlathleinak kan tuah tik ah Myanmar ralkap he pehtlaihnak an ngeih kan theih,” tiah Facebook nih a chim.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.