Falam FC nih CYO Cup Champion ngah

Kuala Lumpur – CYO Malaysia Cup pi cu tuni October 13 ah khuaruahhar takin Falam FC nih a co. Malaysia um Chinmi 400 dengmang nih an zoh hna.

Falam FC le Vazun FC champion aa cuh ding an si nain Vazun FC nih ruah lo piin a sungkhan caah Falam FC nih champion a co, tiah CYO Malaysia nih The Chin Express ah a chim.

Semi-final puai khatnak ah Falam FC nih 3-0 bakin Chinland FC a thlak. Falam FC hi a thli tein an rak thiam taktak. An tha hrim tthawng tuk.

Semi-final puai hnihnak ah Vazun FC nih 4-1 bakin Vaurawng FC a thlak ve kha cu puai a zohmi tampi nih ‘wow, Vazun nih maw champion a co te hnga..’ an ti len.

Vazun FC hi atutiang Malaysia Chin Football Club ahcun voi tambik champion a ngahtu si caah Malaysia Chinmi cheukhat nih cun bawlung puai paoh hi Vazun ta phun in an ruah pah cang.

Vazun le Vaurawng an chuih lio ahhin ruahpi a sur pah caah an cin dih, celtual zong a nal i a cet caah thaba taktak in zaanlei 6:10pm ah an dih.

Minutes 30 i dinh in 6:40pm ah Vazun le Falam FC champion aa cuh ding an si. Nikhua a chiat caah khua zong a mui pah deng cang (final half time hnu ahcun a mui ding si), celtual hi mei a um lo caah khua mui lakah chuih awk a ttha lo.

Vazun FC nih an thabat a damlo buin cet lak i peh tthan ding cu a ruah khawh ti lo caah final chuih loin a sungkhan lawlaw, tiah CYO Malaysia nih a chim.

“Tutan CYO Cup cu ka lungrawk bak. Vazun FC nih ttihmi kan ngei lo. Nain ruat cio hmanh u, nal lak le cet lak ah tha dih cikcek in kan chuih hnu ah suimilaam 1 tal i dinh loin final chuih tthan ding cu hramhram in sunghtermi pei kan lawh ko cu. Va chuih tthan hmanh usih law half time hnu cun khua a mui lai i mei loin zeitin dah kan chuih lai? Falam FC cu an palh bak lo, nain CYO upa khuakhanmi cu ka lungtling hrim lo,” tiah Vazun FC chungtel pakhat nih a chim.

Falam FC
Falam FC – CYO Cup Malaysia 2018 Champion

Cutin Falam FC nih champion a ngah i Vazun nih pahnihnak a ngah.

Vazun FC hmaikal Sopum cakei Van Bawi Thawng (No. 11) cu a rak thiam hrim. A bawlung chuih daan a tha dam, a nuarmi a lo nain fawi tein bawlung an chut kho lo. Goal 7 in tutan CYO Cup ah goal tambik a goal tu si. Amah changtu nih goal 5 a den ve.

Champion laksawng RM2,000 le pahnihnak laksawng RM1,000 cu tuni ah an pek cang hna nain Champion trophy le atanglei langhtermi laksawng;

  • Hmaikal thiambik
  • Alaikal thiambik
  • Hnukham thiambik
  • Goal bawh thiambik
  • Voi tambik a goal tu
  • A chuihmi vialte lakah a thiambik
  • Kum 20 tang mino lakah a thiambik le
  • Ningchim (coach) thiambik laksawng hna cu Chin ram awttha Ni Len Par Mawi le a hawile 7 nih November 5 i CYO Concert tikah an pek te hna lai.

Acunglei langhtermi pumpak laksawng ngahtu pawl hi a fiang rih lo. Thaizing ah bawlung comittee nih an ceihte lai.

Kuala Lumpur ah CYO Concert an tuah lai

November 5 khi Chin ram awttha 8 telh in CYO Concert an tuah lai. Chin Miphun Ni tuahnak Chinese Assembly Hall ahkhan zaanlei 1pm in 6pm tiang an tuah lai.

CYO Concert ah hlasa ding Chin ram awttha 8 hna cu;

  1. Ni Len Par Mawi
  2. Cung Hlei Lian
  3. Esther Dawt Chin Sung
  4. Siang Lian Tum
  5. Ce Ce
  6. Tial Leng Cuai
  7. Paling le
  8. Nacholas hna an si.

Esther Dawt Chin Sung, Cung Hlei Lian le Tial Leng Cuai hi Mie nih an khrihfabu kum 10 tlinnak Jubilee ah hlasa dingin an sawmmi hna an si, CYO nih an concert caah an sawm chin ve hna.

Adang awttha 5 hi cu CYO Malaysia nih amah tein Myanmar ram ah a cahmi hna an si.

Kuala Lumpur ah Global CYO Conference an tuah lai

CYO Conference - Kuala Lumpur

October 26 in 28 tiang, Kuala Lumpur ah ni 3 chung Ramkip CYO Conference an tuah lai.

US CYO President Salai Tial Khar Lian, Australia CYO ngunkeng Ruth le Kalay-Kabaw CYO ngunkeng Bawi Neih Sung an ra lai, tiah CYO Malaysia nih The Chin Express ah a chim.

Hakha CYO in;

  1. Salai Van Lal Cross Thang,
  2. Van Cin Thang,
  3. Jacob Thang le
  4. Van Ni Hup an ra ve lai.

Center CYO (Chin state) in Salai Bawi Uk Thang le adang pakhat (min a fiang rih lomi) zong an ra lai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.