Fihnung palek: Palek nih Myitsone Tidil duhlo-langhternak hruaitu taza an cuai

Duhlonak langhtertu pawl taza an cuai lengmangmi hna hi fihnung taktak a si. Mipi nih kan duh lomi cu zalong tein kan langhter awk a si i cozah zong nih mipi duhnak kha a zulh ding si. Cucu democracy a si.

Tuluk cozah nih Tuluk ram mei peknak caah Kachin state i Myitsone tiva nganpi dil a timh. Kawlram caah zeihmanh hlawknak a um lo pinah, tiva kam khuasa mi le dum tampi ti nih a khuh dih ding a si.

Mah ruangah Kachin khualipi Myitkyina ah nizaan ah minung 10,000 hrawng nih duhlonak an langhter. Duhlo-langhternak hruaitu palek nih taza an cuai.

Duhlo-langhternak hruaitu nu Ja Hkawn cu palek nih Peaceful Assembly and Procession Law Dal 20 in taza an cuai. Biaceihzung nih ‘a sual ko’ a ti ahcun thla 1 thongthlak pinah MMK10,000 liamter a tong kho.

Palek hi Ramchung Vuanci Zung nih a ukmi an si. Ramchung Vuanci Zung cu ralkap nih an ukmi a si. 2008 Phunghram nih ralkap kut ah a pek. Myanmar ram hrapcheu cu ralkap nih an uk peng rih ko.

Myitsone tiva dil dingin China cozah a rak petu hi Ralkap cozah a si. Mah hi an dil khawh ahcun vawlei cung tiva-electric vialte lakah a nganbik 15nak a si lai. Pe 458 a sang lai i pe 4,000 leng ti a cawm lai. Tiva hme deuh 2 zong a khuh dih lai. Mei tha 6,000 MW a chuah lai. Inn 6 million leng mei a pek khawh lai.

Mah vialte chungah 90% cu China ram caah a si dih lai pinah, pawngkam khuasa Kawlrammi tampi harnak an tong lai.

Aho Myanmar rammi nih dah a duh lai? Ka duh lo ti langhter ruang i tazacuai cu apoi taktak. Ralkap le palek hi ram vengtu si loin ram zuartu le rammi fahnak petu an si. Fihnung taktak an si.

January 29 in February 5 tiang Union Hlutdaw ah 2008 Phunghram remhtu bu dirh kong an ceih. Ralkap le USDP MP pawl nih an doh len nain MP tam deuh [tlangcung party le NLD MP pawl] nih dirh an duh caah an fehter khawh.

2008 Phunghram remh hmanh duh ttung loin MP a ttuanmi hi cu ram le miphun dawtu an si lo. Mah paw caah, mah lahkhah ngahnak ca menmen ah MP aa cuhmi an si.

Hmai kum 2020 November thla ah Kawlram pumpi ah thimnak a um tthan lai. 2008 Phunghram remh hmanh a duh lomi le hi tluk fihnung ralkap he aa bawmmi party cu vote bak lo ding.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.