Germany airport sandahpiah ruangah vanlawng 640 an cancel

Germany ram airport tampi i security rianttuan pawl nih nizaan ah sandah an piah ruangah vanlawng 640 deng an cancel i khualtlawng 100,000 hrawng harnak an tong.

Germany ram chung airport 3; Duesseldorf, Cologne-Bonn le Stuttgart in zuang dingin timhmi vanlawng 1,050 chungah acheu fai bak let/cancel an si.

Germany ram chung airport nganbik 3nk a simi Duesseldorf City Airport nih, “Nilini ah zuang dingin vanlawng 580 kan timhmi chungah 370 kan let/cancel,” tiah thawng a thanh.

Zingka 3am in zaanttim tiang sandah an piah caah khualtlawng ting 1 hrawng harnak an tong, tiah Germany thawngzamhca DPA nih a ttial.

Cologne-Bonn Airport in vanlawng 200 zuang dingin timh a simi zong 131 an let. A zuang khomi tlawmpal zong voi dang bang tluang tein an tim kho lo, an tlai dih cikcek.

Munich airport in a zuang ding vanlawng pawl zong sandahpiah ruangah let an tong.

Germany ram pumpi airport security rianttuan 23,000 hrawng a aiawhtu bu Verdi nih sandahpiah cu a hruai hna. “Airport security rianttuan pawl an hlawh i suimilam 1 ah $23.08 ah kaih hna…” tiah vanlawng company pawl a hal hna.

Atu hi Germany ram chung airport security rianttuan pawl an hlawh aa zat cio lo. Nichuahlei airports pawl ahcun suimilam 1 ah $16.10 an pek hna i Nitlaklei le khualipi Berlin ahcun $19.55 an pek hna. –AFP

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.