Hakha ah a rami motor accident in kum 4 ngakchia Catherine a nunnak liam

Hakha ah a ummi Pu Van Ral Thang fanu Catherine, kum 4 cu zahan zaanlei 5pm hrawngah motor accident in a nunnak liam. Tuni ah Hakha khua um St.Joseph Cathedral biakinn ah ruak thlah thlacamnak an tuah.

Pu Van Ral Thang, kum 47 le a chungkhar cu anmah motor in zahan zaanlei ahkhan Kalay in Hakha lei ah an rung kai. Lumbang le Var kar (meng tung 67/4 le 67/5 kar) ah motor accident an tong.

Ramdang in a rak tlungmi an chungkhat an va tong hna i Hakha an kir lei ah vanchiat an ton hi si.

Lam thlang i pe 150 hrawng a thuhnak horkuang ah an tla.

Motor cu Pu Van Ral Thang nih a mongh i a nupi Lalchhanchhuahi, kum 35 le adang nu 5 (an dihlak minung 7) an i cit.

Motor a ran pah caah a tlai/tthing kho lo i lam thlang ah a tlaknak si, tiah Ramchung Vuanci Zung nih a chim.

Hakha ah a rami motor accident in kum 4 ngakchia Catherine a nunnak liam

Catherine cu a hnakhaw in thi a chuak i alu zong kuai. A hmun ah a nunnak liam.

Caroline, kum 8 cu a kehlei mit a phing, a hnar thi chuak.

Pu Van Ral Thang, Pi Lalchhanchhuahi le adang 3 hna cu an mittlang, hnar, keng le liang an i khawng. Zahan zaan ahkhan Falam sizung ah an kalpi hna.

Motor mongtu Pu Van Ral Thang cu Falam palek sakhan nih Misual Upadi Dal 304 (a), 337, 338, le 279 in case an tuahpiak i kherhlainak an tuah lio a si.

Misual Upadi Dal;

  • 304 (a) – daithlan ruangah minung thihter
  • 337 le 338 – midang nunnak caah ttihnung tiangin fahnak pek
  • 279 – daithlang in motor mongh
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.