Hakha ah Ralbawi Aung San milem chiah tthan ding cu khuami cheukhat an lungtlinglo

Chin khualipi Hakha ah Ralbawi Aung San dar milem phun an timhmi cu khuami cheukhat an lungtlinglo, ‘adang a herh deuhmi pawl tu hi usa pek in tuah deuh awk a si’ an ti.

“NLD cozah nih state le region pawl ah Aung Sang milum phun biapi ngai in an ruah i an tuahmi hi ka lungttha lo. Kan ram ah hi nakin a biapi deuhmi rian tampi a um. Harnak zong tampi kan tong hna, rammi hna zong an si fah lio ah tangka dih in milem ser nakin ram tthanchonak rian hi usa pek in ttuan hna seh ti ka duh deuh,” tiah Hakha khuasa Mai Par Tial nih a chim.

“Ralbawi Aung San cu ram pumpi luatnak caah hruaitu a si ti kha kan thinlung ah a um cun a za ko, biapi ngai in milem an serpiak thawngin kan upat deuh hlei lai lo,” a ti.

Hlan zongah Aung San milem cu Aung San Pangpar Dum chungah an rak chiah nain pangpar dum a rawh hnu cun Aung San milem remh zong a um lo, a rawk in a kuai. Cu hmun ah Chin Ram Upadi Inn an sak lio ah milem cu an rak tthial.

Mah kong he pehtlai in Chin Upadi Lutlai Changtu U Aung Than nih, “atu cu milem chiahnak hmun a um lo caah kan i ceih lio lawng a si rih, mah milem hi cu hlan tein Hakha ah a um cangmi si bang a umnak hmun tthial khi si ko, Chin miphun cu Panglang hnatlaknak tuah lio tein aa rak telmi kan si caah Aung San milem chiah hi a poinak um lo,” tiah a chim.

“Chin ram nih Ralbawi Aung San milem hi a herh lo. Amah cu Chin hruaitu zong a si lo caah a herh lo. Cun, milem hlun kha pangpar dum thar ah kan tthial lai an ti nain, milem hlun cu a rawk tuk cang,” tiah Hakha inntek Salai Van Chan Ceu nih a chim.

State dangdang hna zongah NLD party le state cozah nih Aung San milem phun an timhmi cu inntek nih duhlonak an langhter len.

| Salai Benezer – Chin World

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.

Zeitin na ruah?

Zaangfah na comment ṭial!
Zaangfah tein ka hin a min ṭial